Chicha ‘dothuartha’ Bareto
Tá cleasaíocht & éagsúlacht in Impredecible

Spalpadh gréine trópaiceach i lár an gheimhridh é albam #5 ó Bareto Pheiriú, ceannródaithe an cheoil chicha chomhaimseartha.

Fosheánra Peiriúch de cheol cumbia é chicha, a tháinig ar an saol sna 60í nuair a bheartaigh grupaí mar Los Destellos agus Juaneco Y Su Combo ar scála peinteatonach an cheoil thraidisiúnta Aindéisigh, eilimintí surf-rock is ceol sícideileach, agus cnagadh Cúbach a mheascadh le bunfhuaim cumbia na Colóime.

Toradh súiteánach é an chicha mar a chleachtaíonn Bareto é ar chrosphailniú le dub-cheol agus ceol leictreonach, agus sa mhéid sin tá macallaí láidre de Manu Chao agus Gotan Project ag baint le sceainc mheirbh atmasféarach rianta mar ‘La Voz Del Sinchi’ agus ‘La Negra Y El Fantasm’.

Chuirfeadh an leithéid támhnéal ort tar éis tamaill, is fíor, ach cinntíonn cleasaíocht agus éagsúlacht ceoil Impredecible nach dtiteann an saothar ina leadráin.

Tugann Bareto faoi rithimí Aifrea-Pheiriúcha festejo don gcéad uair ar an ‘El Loco’ meallacach i dteannta Susana Baca, tá blas milis Haváíoch ar ‘La Semilla’, tugann ‘Viejita Guarachas’ cuireadh do ‘Ghostown’ síorghlas The Specials freastal ar chóisir merengue i lár na hAmasóine, agus lasann stíl aerach chicha na sean-ré ‘Bomba Baile’ tine faoi do chosa.

Níos sásúla ná seal ar an leaba gréine, is níos sláintiúla chomh maith.