Cuardaigh mé iad ach laige ní bhfuaireas!
Léirmheas ar 'Air Texture VI'

Cad é seo, go díreach? 

Thug úinéir an lipéid ceoil Air Texture, James Healy, dúshlán do Steffi agus Martyn, DJanna tí ag Berghain/Panorama Bar in Berlin, tiomsachán de rianta ceoil leictreonach ó léiritheoirí éagsúla, nár eisíodh go dtí seo, a chur le chéile don séú heagrán bliantúil sa tsraith Air Texture.

An t-aon choinníoll ná nach mbeadh rianta móra don urlár rince i gceist, agus tá idir cheol IDM, theichnicheol, leictreo agus cheol druma is doird ceirbreach le clos thar 26 rian.

Bí ag súil le ceol úr ó Actress, Shed, KiNK, FaltyDL, Appleblim, As One, Total Science, agus dBridge a taifeadadh i dteannta James Lewis na hÉireann. 

 

 An bhfuil aon mhaith ann? 

Aon mhaith?! Más ceol domhain leictreonach a shásaíonn riachtanais na gcluas agus an na colainne atá uait tá tiomsachán na bliana aimsithe agat. 

Léiríonn ardchaighdeán na rianta atá bronnta ag léiritheoirí mór le rá mar Shed agus KiNK ar Steffi agus Martyn do Air Texture VI an meas atá ag léiritheoirí i gcoitinne ar an mbeirt. Níos spéisiúla ná sin, tugann scoth na rianta anseo, ó lámha léiritheoirí nach mbeadh aon chur amach agat orthu (Afik Naim, Mesak, Late Night Approach, léargas ar luach Steffi agus Martyn mar thaiscéalaithe a bhíonn ag aimsiú seod sonach de shíor. 

Tóg buillí droimneach agus cordaí leaisteach ‘Sad Smile’ ón léiritheoir dubchéime V.I.V.E.K., mar shampla. Nó fuaim leictreo glan, spárálach ‘Shelby’ de chuid 214. 

An mbíonn dub-teicnicheol drithlíneach fomhuirí Answer Code Request (‘Pasiris’) ar na cluasáin ag na míolta móra mara agus an ghrian ag dul faoi? Déarfainn é!

Tugann ‘Watercolour Challenge Part II’ le Actress siar go fuaim na gcnuasach Artificial Intelligence a d’eisigh ceirníní Warp ag tús na 1990 sinn,  é ar nós Speedy J a cumadh ceoil i dteannta Aphex Twin istigh i bhfolcadán analógach. 

Scaipeann an ‘Into Bleeps’ iontach le Shed scata blípeanna  leictreonach thar chordaí teann dordveile agus buillí griothalach, mar a mbeadh cluiche faoileáin ag eitilt os cionn na tréanmhara.

Is fiú iarrachtaí Tracing Circles, FaltyDL, agus Martyn is Steffi féin a mholadh, freisin.

Laigí? D’fhiafraigh mé do thaobh míthrócaireach mo choinsiasa. Freagra ní bhfuaireas!

An breithiúnas?  Bailiúcháin den gcéad scoth a nochtann gnéithe follasacha le áth-éisteacht.