Cad é seo, go díreach? Tugann an léiritheoir/cumadóir ceanndána Laurel Halo faoi eagrán 68 sa tsraith sheanbhunaithe DJ-meascáin Dj-Kicks a chur le chéile.
As Ann Arbor, Michigan ó dhúchas do Halo ach tá sí ag cur fúithi in Berlin. Bíonn sí ag eisiúint ceoil ar lipéid cheannródaíocha mar Hyperdub agus Latency.
Cé go n-athraíonn blas ceoil féin-léirithe Halo ó eisiúint go heisiúint mar DJ, tá claonadh aici i dtreo ceol dúshlánach ilrithimiúil agus rianta teicneó griotalach le béim ar na minicí arda seachas ar an ndord.
Bí ag súil le rianta eisiacha a chlos ar DJ-Kicks ó Ikonika, Machinewoman, FIT Siegel, Nick León agus Laurel Halo féin chomh maith le seoda dearmadtha ó sheanfhonndúirí mar Blake Baxter agus Jeff Mills/Final Cut.
An bhfuil aon mhaith ann?
Meascán garbh, míshuaimhneach é DJ-Kicks, agus Halo a stracadh tríd 29 rian in achar 60 nóiméad.
Tá brí leis mar mheafar don ndiabháil atá déanta ag brabhsáil ar an idirlíon d’achar airde an duine, b’fhéidir, ach seachas sin níl sé soiléir cén fáth go bhfuil beartaithe ag Halo gan spás anála a thabhairt dá rogha rianta, nó d’éisteoirí DJ-Kicks féin, fiú.
Tá ceol den scoth anseo, is fíor, ach ní leor 2.06 nóimead ar an meán do gach rian.
Is maith liom func corrach ‘Poliwhirl’ de chuid Facta, agus atmaisféar briosc-ach-liobarnach ‘Plastic PQ’ le Yamaoka, ach tá blas rómhór ar an mbeagán díobh atá á sholáthar ag Halo anseo le mo chluasa a shásamh.
Ditto an rogha spéisiúil de rianta sa stíl gqom ó Graffit Vigo, Panda Lassow agus Dario Zenker a nochtaíonn Halo sa leath slí tríd Dj-Kicks.
Léiríonn an ghluaiseacht bhreá ó acid house fuinniúil ‘Funky World’ de chuid Blake Baxter trí bhlípeanna bearránacha ‘Freakey Keke’ le Kiki Kudo isteach in EBM róbatach ‘Ketabali’ le Group A na Gearmáine cumas teicniúil Halo ach domsa níl a dhóthain measa aici ar thábhacht leanúnachais fuinnimh an dj-meascáin.
Mar sin féin, éiríonn le rogha dána Halo feidhm a bhaint as veidhlíní scrábach ‘Brian’s Having A Party’ leis an gcumadóir trialach Geoffrey Landers mar dhroichead idir acid trance Aos agus dord-teicneó Via Maris.
Laigí? Easpa foighne in áiteanna agus cur chuige ró-intleachtúil áiteanna eile, go bunúsach.
Dá mbeadh dhá thrian an oiread rianta roghnaithe ag Halo agus dhá oiread an méid ama caite aici i mbun machnaimh ar conas iad a mheascadh le chéile is chun leasa DJ-Kicks a bheadh sé.
An breithiúnas? Rogha spéisiúil rianta idir dhúshlánach agus dhinimiciúil ach eitilt saghas corrach é Dj-Kicks nuair is Halo atá i gcró an phíolóta.
____________________________________________
Tá Laurel Halo DJ-Kicks le fáil anois ar lipéad !K7
