Féirín de mixtape
ó Sufjan an ghlóir bhinn

‘The Greatest Gift’ – Sufjan Stevens


Cad é seo, go díreach?

Cnuasach d’athmheascáin agus leaganacha samplacha de rianta ó albam deireanach Sufjan Stephens, Carrie & Lowell (léirmheas anseo), taobh le ceithre rian ón seisiún taifeadta céanna nár eisíodh go dtí seo (‘Wallowa Lake Monster’, ‘The Hidden River of My Life’, ‘City of Roses’ agus ‘The Greatest Gift’).

Beidh The Greatest Gift Mixtape á eisiúint ar chaiséad beag buí dos na fíor-hiopstairí, ar cheirnín buí dos na bréag-hiopstairí, agus go digiteach do gach éinne eile.

Bronnfar ceatadán den bhrabús a dhéantar ar an eagraíocht idirnáisiúnta Cancer Support Community.

An bhfuil aon mhaith ann?

Bainne na máthar é glór Stevens dos na cluasa seo.

Ábhar sóláis don chroí brúite, beathú anama don ndonasaí.

Bhí Carrie & Lowell féin chomh foirfe mar shaothar gur beag iontas é go bhfuil an formhór den bhfuílleach ó bhord Stevens níos blasta ná an bia bog a chuireann lucht a aithrise romhat mar phríomhchúrsa.

Tá ‘Wallowa Lake Monster’ ar an amhrán is láidre den cheithre chinn nua-eisithe.

Fillean Stevens ar bhás agus ar phearsantacht lochtach a mháthar mar ábhar, is é ag canadh “As we wait for the waters to reside / Her remarkable stoicism and her pride / When the dragon submerged we knew she had died”, sara dtagann borradh aoibhinn drámatúil ar an gceol i dtreo an deiridh buíochas do nótaí sínte na dtéaduirlisí agus tionlacan ó chór ban.

Tá seinniúint shilteach giotáir Stevens ar ‘Drawn to the Blood – Fingerpick Version’ ina pléisiúr ceart.

Cé nach bhfuil athmheascáin Thomas Bartlett (Doveman, The Gloaming) agus Stevens féin ró-lag in aon chor, is le Helado Negro is fearr atá éirithe anseo mar athmheascóir; ar leagan ruithneach de ‘Death With Dignity’, go háirithe.

Laigí?

Tá blas na háiféise ar fhéinmhachnamh Stevens i gcás ‘The Rivers of My Life’ (“I’m a walker, I’m a drinker/ Safeway shopper, thunder egg reader / I’m a biker, yeah, I’m a beaver / Web-foot walker, trailblazing fever”).

Pléisiúr róghearr é an t-amhrán ‘The Greatest Gift’ féin.

In ainneoin theachtaireacht sho-mholta an amhráin (“The greatest gift of all… is to love your friends and lovers / To lay down your life for your brothers”), tá sé thart laistigh de dhá nóiméad.

Ní fhéadfá a rá go n-oireann teannas agus línte géara sintéiseora athmheascán 900x de ‘Fourth of July’ do bhrí an bhun-amhráin ach oiread.

An breithiúnas?

Muna bhfuil Carrie & Lowell cloiste agat cheana féin ní mór tosnú ansin.

Más rud é go bhfuil, déanfaidh The Greatest Gift cúis go dtí go mbronann Stevens albam úrnua orainn.