Tháinig Hairless Toys aniar aduaidh orm.
Dhein Róisín Murphy ionsaí as luíochán orm sa chasadh sin sa bhóthar ina gcastar an ealaín uasal, sofaisticiúil agus popcheol na gcairteanna ar a chéile.
Orm féin atá an locht, gan dabht, as Murphy a mheasadh faoina luach.
Fiú i laethanta Moloko bhí Murphy ró-ghlic chun glacadh leis an ról mar réalta phopcheoil a ndearna na meáin iarracht a bhrú uirthi, ach ní shamhlaíos go mbeadh tír-raon ceoil Murphy athraithe chomh mór agus atá sa tréimhse ocht mbliana ó eisíodh a halbam deireanach, Overpowered (2007).
Is minic a labhraítear faoin bpop-amhrán mar shlí éalaithe (fiú muna mbeadh ach trí nóiméad go leith i gceist) ó réaltacht ghránna, leadránach an tsaoil.
Tá aidhm níos glóirmhianaí ag Murphy.
Ar Hairless Toys cloistear an pop-amhrán mar fhreagra craobhlasrach, misniúil ar an náiriú agus an ghéarleanúint gan staonadh a dhéantar orthu siúd a bhfuil sé de rogha nó de mhí-ádh acu maireachtaint lasmuigh de ghnáth-chuimsí formheasta an tsochaí.
“There is no inclusion for those stigmatised, nobody close to us gets recognised”, a chanann Murphy ar ‘Gone Fishing’, chéad amhrán an albaim, agus saothar a chum sí tar éis di scannán faisnéise Jenny Livingstone, Paris Is Burning, faoi mhuintir thrasghléasta Nua-Eabhrac na n-ochtóidí a fheiscint.
Tá athshondas stairiúil ag baint le fuaim dioscó-func uilleach ‘Gone Fishing’ i gcomhthéacs ábhar an amhráin, ach ní chaitheann Murphy an t-albam ar fad i mbun aithrise ar Grace Jones.
Ar an oiread céanna, ní cáineadh é le rá go bhfuil macalla de Stevie Nicks le clos ar ‘Unputdownable’, de Dani Siciliano ar ‘Exploitation’ (is é Matthew Herbert a bhí i mbun na gcnaipí ar albam début aonair Murphy, Ruby Blue) agus de Beth Gibbons (Portishead) ar an amhrán ‘Hairless Toys’ féin – is drámadóir d’amhránaí í Murphy a athraíonn stíl a cur i láthair de réir riachtanais an róil.
Is fíor-dhrámatúil mar a bheireann sí greim ar amhráin mar an ‘House Of Glass’ eipiciúil, a glór contralt á mhúnlú aici de réir bhrí na bhfocal.
Tá obair léiriúcháin Eddie Stevens, comhoibrí ceoil Murphy ag dul siar go laethanta Moloko, thar na bearta.
Seo albam a bhfuil glór mór, saibhir, forleitheadach ag baint leis.
Fiú agus gnéithe de gach rud ó cheol house uasal na hEorpa (Floating Points, ceirníní Kompakt) agus dioscó dorcha le clos sna hamhráin seo taobh le heilimintí snagcheoil, ceol tuaithe agus gaspal, tá smacht máistriúil ag Murphy ar chúrsaí ó thús go deireadh.
Albam greannmhar, sultmhar, glic.
