Peigín albaim laig
Léirmheas ar ‘Dj-Kicks’ Peggy Gou

Cad é seo, go díreach?

An chéad dj-meascán oifigiúil riamh ó Peggy Gou, dioscmharcach agus léiritheoir as an gCóiré Theas atá anois ag cur fúithi i mBeirlín.

Bhí ‘It Makes You Forget (Itgehane)’ le Gou ar bharr a liostaí de rianta house na bliana 2018 ag mórán daoine, go háirithe Special Request (Paul Woolford), a thug “léamh thar a bheith úr agus nua-aimseartha ar an bhfuaim deep house a mhothaíonn díreach ceart” ar an rian agus é ag caint le NÓS i mí na Nollag seo caite.

Ach ní hionann cúram an léiritheora agus gnó an dioscmharcaigh, agus níl gach duine den tuairim go bhfuil an t-árdan atá tugtha ag eagraíochtaí mar Boiler Room do dhioscmharcaíocht Gou tuillte ag an mbean óg.

Tá tábhacht leis an dá fhocal sin: bean óg. Cuirfimíd focal eile leo: álainn.

Sea, ambaiste, tá an t-idirlíon dubh le ráitisí ó fhir ag fáil locht ar dhioscmharcaíocht Gou, agus freagraí ó mhná ag maíomh nach bhfuil sna fir chéanna ach gnéasaígh.

Ní ceart an milleán a chur ar Gou as an rud go bhfuil sé i bhfad níos éasca margaíocht a dhéanamh ar spéirbhean óg ná mar atá ar shean-leaid maol, ach ní cúis í sin gan bheith oibiachtúil faoi chumas dioscmharcaíochta Gou.

Bealach macánta chun ár mbreithiúnas a thabhairt ar luach Gou mar dgioscmharcach, de réir na dtuairimí cearta poiblí, ná comparáid a dhéanamh idir í agus beirt spéirbhan óga eile a bhíonn ag meascadh ceoil.

Go teicniúil, níl Gou leath chomh sciliúil is atá Helena Hauff agus Nina Kraviz, abair, ach bíonn rogha ceoil mhaith fhuinniúil aici, go hiondúil, agus fiú má chailleann sí smacht ar an meascadh ar uairibh, tá a croí sa cheol.

An bhfuil aon mhaith ann?

Seachas fuinneamh a seiteanna sna clubanna a athchruthú, le DJ-Kicks cuireann Gou fáilte roimh an éisteoir isteach ina seomra suite chun éisteacht le roinnt de na ceirníní is mó a chuaigh i bhfeidhm uirthi síos trí na blianta a bhlaiseadh. Meascán é a léiríonn ómós Gou d’oidhreacht an cheoil rince leictreonaigh; idir dioscó, teicneo, house, rave agus leictreo, bhí leath den rogha seoeisithe sara rugadh Gou in 1991.

Cuireann seoid de rian teicneo gan bhuillí – ‘Fluresence’ (1993) le Spacetime Continuum – tús aoibhinn, réchúiseach le cúrsaí. As sin sleamhnaímid isteach i bhfunc teochriosach ‘Hungboo’ le Gou féin. Is é an chéad rian a chum sí riamh, agus ní deacair a thuiscint cén chúis nár eisíodh cheana é – níl sé thar mholadh beirte. Fós, éiríonn leis mar cheap lainseála do fhunc casta, lán-línte lúbach Roland 303 agus rithimí tríríneacha ‘Earwig’ (2018) de chuid Pearson Sound.

As sin déanann Gou cúrsa a rianú ó shnag-func leictreonach Pegasus ‘Perseguido Por El Rayo’ (1983) trí athmheascán lagmheasartha Bailéireach Andrew Weatherall de Sly & Lovechild (1990) isteach i dteic-house domhain ‘Rytm804’ (2019) le Dorisburg na Sualainne, agus ar aghaidh go rian glioscarnach teicneo le Hiver (‘Pert’) nár eisíodh cheana.

Laigí?

Tar éis di stracadh trí theicneo stadach Kyle Hall (‘Flemmenup’), leictreo glioscarnach lán-airpéisteannaí DMX Krew (‘EPR Phenomena’) agus réabh-cheol cruadhéanta Shades Of Rhythm (‘Exorcist’), tá meascadh gránna in ‘Magnetic City’ le Kode 9, agus tá an ghluaiseacht chiotach as sin go ‘Vampirella’ le The System níos measa fós.

Níl ‘Vordhosbn’ ar an bport is fearr a chum Aphex Twin riamh, agus cé go molaim ‘Illusion’ le Derrick May agus ‘Crackdown’ le Carl Craig mar roghanna is deacair a thuiscint cén fáth a meascann Gou isteach chomh míchúramach iad.

An breithiúnas?

Ábhar cainte do lucht cáinte Gou, agus ceol idir láidir agus lag measctha ar nós cuma liom.

Ná bac.


Peggy Gou – Dj-Kicks le fáil anois ar cheirníní !K7.