Rednecks le Gaeilge!
Amhrán ar mire ag banna Québécois-Éireannach-Síneach

Níl an oiread sin amhrán Gaeilge ina bhfuil toitíní draíochta, snaoisín bán agus uisce beatha luaite le chéile (traic nó dhó de chuid Bréag b’fhéidir? Eag.) ach sin díreach an rud atá déanta ag an Québec Redneck Bluegrass Project.

Is banna é seo a bunaíodh sa tSín sa bhliain 2007 agus a bhfuil cúigear fear as Québec ann, mar aon le duine amhráin, Mark Corry, as Éirinn.

Meascán mire mearaí den bluegrass, ceol domhanda agus punc a sheinneann na fir seo agus is minic a dteanga ina bpluc acu agus iad ag cur síos orthu féin nó á gcur féin in iúl ina gcuid amhrán.

“Almost every song is about monster trucks,” mar a deir siad féin.

Ach is taitneamhach an meascán é agus amhráin eisithe acu anois sa Fhraincis, Béarla, Sínis agus Gaeilge.

‘An Bhainis Salach’ (sic) is teideal dá rian Gaeilge – a eisíodh ar an albam 3000, Boulevard De Mess in 2011 – agus, cosúil le go leor d’amhráin an Québec Redneck Bluegrass Project, is port sciobtha fiáin é a bhfuil scéilín greannmhar ag dul leis.

Éist leis, agus cuir ort do bhróga damhsa!

Liricí faoin seinnteoir.



An Bhainis Salach

Phós mo chara an bhliain seo caite
bhí gach aon duine ann ag damhsa
Shuigh mé síos le mo chairde ag an mbarra
Ach ní cuimhin liom an deireadh

Níos moille, d’iarr siad orm dul chun cúirte
Chun freagairt an cúpla ceisteanna
D’iarr siad orm an raibh mé ar meisce?
Dúirt mé sea, is bhí mé cinnte

Nuair a fuair mé amach cad a bhí ag tarlú
Chuaigh m’aghaidh dearg leis an náire
Níor chuir sé fiacail ann, “mar is tú an t-amadán”
Is phléasc an áit go léir ag gaire

Ó sea, anois, is cuimhin liom mo chairde ag caint…

Tóg an toitín draíochta (Tá mé as mo mheabhair)
Seo duit, ól an t-uisce beatha
Tóg an líne cóca (Tá m’intinn i mo phóca)
Is anois ár n-ionstraimí a sheinnt

qrbp-2