Úinéirí iad Coldcut (Jonathan More agus Matt Black) ar cheirníní Ninja Tune, agus beirt de na dioscmharcaigh is sciliúla agus is samhlaíche dá bhfuil le clos.
D’eisíodar albam úr i rith an tsamhraidh, an Outside The Echo Chamber lán doird comhléirithe i dteannta laoch dub-cheoil na Breataine Adrian Sherwood (On-U Sound).
Agus deireadh na bliana ag teannadh linn, dhein Jonathan More cur síos do Ben Ó Faoláin ar a rogha féin de shár-eisiúintí 2017.
1. KOKOKO! – Tokoliana (ICIyouare)
Banna den scoth as Kinshasa, Poblacht Dhaonlathach an Chongó.
Léirithe ag Débruit, seo ceol Afracach leictreonach funcaíáilte den chaighdeán is airde a ardaíonn teas ar an urlár rince.
2. The Irresistible Force – Kira Kira (Liquid Sound Design)
Albam úr curtha faoinár mbráid ag Mix Master Morris.
Tá tamall fada ann ó d’eisigh rí seo an fhuaimdhreacha shuaimhneasaigh aon cheol nua.
Ar deireadh thiar thall tá sé tar éis filleadh le saothar galánta.
3. Jon Brooks – Autres Direction (Clay Pipe Music)
Bím i gcónaí ag dul ar ais go dtí an t-albam seo.
Fuaim ghlan shéanmhar ainglí nach féidir cur síos air i gceart i bhfocail.
Ceol leictreonach don lá inniu.
4. Golden Teacher – No Luscious Life (Golden Teacher)
Punc func gliondrach don 21ú Aois.
Ná caill an tsár-eisiúint seo, is bí ag faire amach don ngrúpa seo sa bhliain 2018.
5. Ghetto Priest – Every Man For Every Man (Ramrock)
Reggae Briotanach le cur i láthair ó Ghetto Priest a bhainfeadh an anáil díot.
Gaisce déanta ag an bhfear as Ramsgate.
Léirithe ag ardcheannasaí On-U Sound, Adrian Sherwood.
