Tá deireadh tagtha ar Fhéile na Gealaí 2024 agus tá na Gaeil ag teacht chucu féin arís (tá súil agam). Féile iontach a bhí ann i mbliana le togha agus rogha na gceoltóirí, bia blasta, aimsir a raibh gach claochlú uirthi, agus cloigne nimhneacha.
Muna raibh an deis agat ruathar a thabhairt faoi An Bradán Feasa i Ráth Chairn ag an deireadh seachtaine, seo thíos na rudaí is iontaí a chaill tú (agus nach gcaillfidh tú ar an bhliain seo chugainn, OK?)
Joy Dunlop
Thug Joy Dunlop cúpla ceacht sa Típí ar cheol Gàidhlig na hAlban tráthnóna Sathairn. Caoineadh a bhí i gceist le ceann de na hamhráin a theagasc sí don scaifte ach ní raibh an greann in easnamh óir d’aithin Joy go raibh an brón, tubaiste, agus an bás mar phríomhthéamaí an dá thír ina gcuid ceoil.
An Bia
Ní dheachaigh duine ar bith gan bhia ag Féile na Gealaí ach oiread. Thug The Flavoursmyth blaiseadh beag salach de na sceallóga curraithe nó an burgar sicín. Dá mba phíotsa a bhí uait, bhí PIMT & Co. ansin leis na ciorcail cháisiúla nó babhlaí açaí don mhilseog fiú.
Ní féidir liom dearmad a dhéanamh na crêpes ó Food@Events a lua. Má tá tú cosúil liomsa, bíonn dúil bhocht agat sna rudaí milse nuair atá cúpla smailc bainte agat ón chnáib.
Rothaithe Ride for Gaza
Cuireadh fáilte mhór roimh Ainle Ó Cairealláin agus Stíofán Ó Luchráin a bhí ag rothaíocht ar fud na hÉireann ó Bhéal Feirste go Contae na Mí chun airgead a thiomsú don Phalaistín. Bhain an bheirt rothaithe Ráth Chairn amach tráthnóna Aoine i ndiaidh dóibh stopadh i Sligeach, Conamara, Luimneach agus tuilleadh eile.
Thug siad óráid chumhachtach ar chruachás na bPalaistíneach agus na gníomhartha atá á ndéanamh ag daoine chun troid ina leith.
Grooveline
Ní féidir mórán a rá faoi Grooveline seachas funcaí, funcaí, funcaí. Thug siad cur i láthair spleodrach oíche Aoine inar léirigh siad go soiléir an fáth a bhfuil groove san ainm acu.
Níorbh fhéidir an lucht féachana a shocrú nuair a chuir siad deireadh leis an seó le meascán tiúineanna funcaíáilte, ‘100 Years of Funk.’ Ba cheart súil ghéar a choinneáil ar an bhanna sna blianta amach anseo. Tá rudaí móra i ndán dóibh.
Clann Mhic Corraidh
Chuir Clann Mhic Corraidh tús bríomhar leis an fhéile Dé Sathairn agus scoth an tradcheoil á bhualadh acu. Chruinnigh an lucht éisteachta ar na binsí os comhair an ardáin chun cúpla canna a ól agus cúpla steip a dhéanamh.
Chuir an grúpa fuadar faoi chosa na n-éisteoirí agus iad ag damhsa leo faoi sholas na gréine.
The Shan Vans
Thug The Shan Vans seó iontach tráthnóna Sathairn nuair a mheall siad lucht na féile chun ardáin. Dúirt príomhamhránaí an bhanna, Jake:
“Beidh deis againn dul ar an stáitse anocht agus a bheith ag screadaíl ar son na Palaistíne. Tá slad iomlán agus cinedhíothú á dhéanamh ar mhuintir na Palaistíne le 76 bliain anuas agus tá muid ag dul a bhaint úsáid as an ardán anocht chun an díchoilíniú a thabhairt go lár an aonaigh.”
Chuir siad tús le leagan Gaeilge de ‘Fisherman’s Blues’ le The Waterboys sular lean siad leo lena gcéad dá shingil, ‘Inside’ agus ‘This Is Our Religion.’
Chríochnaigh an seisear le cur i láthair spraíúil de ‘Seven Nation Army’ le The White Stripes, ar athraigh siad na liricí ann chun fáilte a chur roimh mhuintir Ráth Chairn agus na cuairteoirí, agus lena dtríú singil atá le heisiúint go fóill, ‘An tSeanbhean’, in ómós don Phalaistín.
Oireachtas na Gealaí
Chualathas ceol binn ar an tsean-nós ar chúl an tí in An Bradán Feasa Dé Sathairn d’Oireachtas na Gealaí. Chuir beirt fáilte roimh an lucht féachana le casadh na fidle sular thug cailín óg as Conamara faoin ardán chun amhrán galánta ar an tsean-nós a chanadh.
Bhí deis ag an lucht éisteachta páirt a ghlacadh le leagan (measartha) muiníneach de ‘Trasna na dTonnta’ agus chan siad leo go raibh tonnta ag teacht as na gloiní beorach!
Huartan
Bhí an deis agam labhairt le Catriona Ní Ghribín sular chuir Huartan athbhrí sa Phágántacht oíche Shathairn lena seó anamúil ildaite.
“Tá Huartan ar bís. Ní fhaca muid Stephen le cúpla seachtain anuas agus é ar shiúl ag rothaíocht. Beidh muid ar an ardán ag a 20:00 le chéile, aghaidheanna lán smididh, agus beidh Clare Sands ag seinm cúpla tiúin linn fosta.”
Chas an grúpa mistéireach a gcuid singlí, ‘Bean Údaí Thall’ agus ‘Fiáin’ a thóg racht scréachaí (den dea-chineál) sa lucht féachana le ráiteas cumhachtach ón ghrúpa agus bratacha na Palaistíne ar foluain ar fud an ardáin: “Gach uile bhliain, téann polaiteoirí na hÉireann go dtí an Teach Bán chun lámha a chroitheadh leis an Diabhal é féin.”
Jiggy
Chun deireadh chur leis an fhéile i mbliana, bhí Jiggy. Cé go raibh an oiread rudaí éagsúla aisteacha feicthe agam an deireadh seachtaine seo, ní raibh mé ag súil le cad a bhí i gceist le Jiggy.
Thosaigh siad amach le tradcheol fuinniúil, chomh fuinniúil sin go raibh bogha an fhidléara ag teacht as a chéile. Bhí an cur i láthair seo go hiontach ach is nuair a thosaigh siad ag meascadh ceol clasaiceach de chuid na hIndia agus amhránaíocht scornaí de chuid na Mongóile le ceol traidisiúnta na hÉireann a thosaigh an spraoi ceart.
Bhí sé go hálainn, bríomhar, suimiúil. Thar aon ní eile, bhí sé dochreidte agus deireadh ceart ar an fhéile a bhí ann go cinnte.
Is cinnte go mbeidh achan duine ag súil leis an fhéile ar an bhliain seo chugainn agus ní mhaím sin orthu ach, don am i láthair, scíste. Anois, cá’l na piollairí sin?
