“Tearmann ceoil ó chora crua an tsaoil”.
Sin an cur síos a dhéanann Rónán Ó Snodaigh agus Myles O’Reilly ar a n-albam nua The Beautiful Road, agus, i ndiaidh domh toradh galánta a gcomhoibre a sheinm gan stad le cúpla lá anuas, caithfidh mé a rá gur fíor dóibh.
Thosaigh an comhar idir príomhamhránaí Kíla agus an ceoltóir/scannánóir as Baile Átha Cliath tamall beag de bhlianta ó shin – eisíodh a gcéad albam, Tá Go Maith, in 2021 – agus tá an caidreamh ceoil eatarthu tagtha chun blátha leis an ofráil is déanaí seo.
Saothar suaimhneach socair 9 dtraic é ar a dtagann anamacha fonnmhara na beirte le chéile chun fuaimdhreach luascach aoibhinn a chur ar fáil dár gcluasa.
Léiriú maith é an traic teidil ar na liricí machnamhacha agus ar an cheol timpeallach séimh atá le cluinstin ar an albam ó thús deireadh.
Tá muid ar fad ar bhóthar álainn, in amanna bíonn sé mín, amanna eile bíonn sé garbh, ach tá sé álainn mar sin féin – sin an bhunteachtaireacht dóchais a thagann trí gach uile rian.
Ar an amhrán ‘Níl Aon Easpa Orm’ (ar scannánaíodh an físeán de ag Loch Craobh ársa i gContae na Mí), samhlaím Rónán ag gabháil buíochas lena mháthair, an dealbhóir agus scríbhneoir Clíodna Cussen, a d’fhág a corp anuraidh.
Ar ‘An Glas ar an Domhan’ agus ‘Calling All Angels’ – tá mo chroí istigh sa dara ceann sin go háirithe – tá sé ag tabhairt léargas dúinn go bhfuil rud éigin eile ag baint leis an saol seo nach féidir a fheiceáil lenár súile i gcónaí.
Is léir ó spiorad an albaim iomláin go dtuigeann Rónán agus Myles gurb ann d’fhuinneamh dúileach na cruinne, go bhfuil sé ag rith trínn agus gur féidir nascadh leis ach a bheith oscailte dó, agus do na heispéiris éagsúla a bhronnann sé orainn.
Ar ‘Anáil Mór Doimhin’ tugann siad leid dúinn go fiú faoi bhealach amháin ar féidir dul i mbun an nasctha sin, linn féin agus leis an Domhan mór thart orainn.
Ach oiread leis na focail rithimeacha ar na rianta thuasluaite, cuireann an dá thraic uirlise atá ar an albam – ‘King of the Kingdom / Rí a’ Ríocht’ agus ‘Bacon, Eggs, Blood and Bread’ faoi gheasa thú mar a bheifeá ag bogadh anonn is anall ar shéideán deas gaoithe.
Ní haon ionadh é sin is dócha mar go ndeachaigh an dá dhraoi ceoil amach faoin tuath – i Ros Comáin agus in Iarthar Chorcaí – chun an saothar a chruthú, agus tá fuaimeanna an dúlra le cluinstin taobh leis an ghlór agus leis na huirlisí ar thraiceanna áirithe.
Fágann sé sin ar fad gur meascán mealltach meabhrach atá sa toradh deiridh, albam draíochta a chuirfidh ola ar d’anam.
Déan gar duit féin mar sin, éist le The Beautiful Road ó Rónán agus Myles agus lig dóibh thú a iompar píosa beag eile síos an bóthar álainn seo.
