Thug Eoin McEvoy an chraobh leis sa chomórtas a reáchtáil Reic ar líne ag an deireadh seachtaine dá rap Gaelach ‘Seo Mo Spás’. Labhair Eoin le NÓS faoina cháil nua mar rapálaí Gaelach.
“Rud a spreag go mór mór mé ná an rud a rinne Gaylgóirí i gcaitheamh an tsamhraidh, Slay sa Bhaile nó Slay at Home. Chuir cúpla duine físeán amach agus spreag an misneach a bhí le feiceáil iontu mé tabhairt faoi mo rud féin. A bhuí le Ciara Ní É atá an rud críochnaithe, seachas a spreagadh sin bheadh sé fós leathdhéanta agam agus gan an físeán curtha leis,” a dúirt sé.
Bunaithe ar rithim an amhráin mhóir rap a tháinig amach níos luaithe i mbliana ‘Bitch Boss’ le Doja Cat atá fuaim rap Eoin, ach na liricí athraithe aige lena ómós a léiriú do lucht labhartha na Gaeilge in Éirinn.
“Theastaigh uaim an pobal a cheiliúradh, ómós a thabhairt dár bpobal agus na héachtaí atá déanta againn a chomóradh. Thosaigh mé sa samhradh, agus d’fhág mé ar leataobh é ar feadh tamaill. Bhí mé ag iarraidh an líne ab fhearr a aimsiú don churfá agus an oiread tagairtí a chur isteach agus a d’fhéadfainn. Ní raibh mórán ama agam an físeán a chur le chéile sa deireadh, bhí sé i bhfad níos casta ná an rud a dhéanfainn ag an obair,” a dúirt sé.
Lorg eagraí Reic Ciara Ní É iontrálacha do chomórtas Reic cúpla seachtain ó shin, agus reáchtáladh an comórtas féin oíche Dé hAoine ar líne. Ghlac os cionn 20 duine páirt sa chomórtas ó cheann ceann na tíre, ach ba é físeán Eoin ba mhó chuaigh i bhfeidhm ar an bpobal. Scaipeadh an rap ina loscadh sléibhe ar na meáin shóisialta agus moladh mór tugtha d’fhear UCD.
“Thuig mé go raibh sé maith, ach ní bheadh a fhios agat céard eile a bheadh sa chomórtas. Bhain mé an-sult as an seó sin, bhí an oiread sin éagsúlachta as na píosaí ar fad, agus ba léiriú é ar cé chomh bríomhar is atá an pobal s’againne.
“Fuair mé freagraí iontacha ó dhaoine ar Twitter faoi. Chuir mé Tweet amach faoi i mBéarla agus i nGaeilge agus bhí an t-aiseolas go hiontach den chuid ba mhó. D’fhág fear amháin trácht ar an Tweet Béarla uaim, ina ndúirt mé rud éigin ar nós ‘Dopes: Irish is a dead language. Mise:’ agus nasc chuig an bhfíseán. Dúirt sé ‘it’s not dead it’s just irrelevant’ – agus caithfidh tú a bheith ag gáirí faoi na daoine seo. Cur amú fuinnimh a bheith ag argóint leis na daoine sin,” a dúirt Eoin.
Níl aon phlean ag Eoin a ndúshlán a thabhairt do rapálaithe móra Bhéal Feirste Kneecap i láthair na huaire, agus dúirt nach raibh sé cinnte an mbeadh spéis aige aon rud eile mar é a chur amach arís.
“Fágfaidh mé acu é. Bheifeá buartha freisin, mar tá brú ag baint leis sin, agus cheana féin tá daoine ag fiafraí díom ‘cén uair a bheidh an chéad rud eile agat?’. Níl a fhios agam an dtarlóidh sé! Dúirt cara liom an lá cheana gur rap an rud is lú a raibh súil aige leis uaim — the most soft-spoken man in Ireland!
“Caithfidh mé buíochas mór a ghabháil le Reic agus le Ciara Ní É as mé a spreagadh. Tá rud iontach cruthaithe ag Ciara i Reic agus, mar a deirtear sa bpobal s’againne, it gives me life,” a dúirt sé.
