Aoife Ní Bhriain agus Mick O’Brien, Ireland’s Edge // Dé Luain 20 Iúil @ 18.00
Tá ócáid chlainne romhaibh tráthnóna, eagraithe ag dream Other Voices, mar chuid den tsraith ‘Ireland’s Edge’. Beidh an píobaire Mick O’Brien agus a iníon Aoife, fidléir aitheanta, ag seinnt ceoil ó bhailiúchán Goodman.
Is éard atá i gceist ná foinn a bhailigh an Canónach James Goodman i gCiarraí Thiar le linn na 1800idí. Is i bpáirt le Taisce Cheol Dúchais Éireann atá an t-imeacht seo eagraithe, mar aon leis an gcuid eile atá ar chlár imeachtaí an lae amárach, ar a dtugtar ‘Through the Looking Glass’. Ar leathanaigh Ireland’s Edge ar Facebook, YouTube, agus na meáin shóisialta trí chéile a bheidh an bheirt le feiscint óna 18:00
Oíche airneáil le Maighréad agus Tríona Ní Dhomhnaill // ar líne, Dé Luain 20 Iúil ag 20:00
Bhíos ag trácht ar Fhéile an Earagail ar an leathanach seo an tseachtain seo caite agus ar an gclár imeachtaí athshamhlaithe atá curtha le chéile acu i mbliana de bharr shrianta na paindéime. Is féile de ‘shrutháin’ atá cruthaithe acu má sea, agus is ar shruthanna gairide a bheidh siad ag díriú.
Ba dheas liom bhur n-aird a dhíriú ar choirm a bheidh ar bun anocht, ina gcloisfear na deirfiúracha Dhomhnaill — Tríona agus Maighréad. Oíche airneáil i nDámhlann an Ghleanna i nGort an Choirce, le Cathal Ó Searcaigh mar fhear an tí. Is ar YouTube a chraolfar an ócáid agus cuirfear tús leis timpeall 20:00.
Tae ag a Trí // gach Satharn óna 15:00 in áiteanna éagsúla timpeall na tíre
Is álainn an smaoineamh atá ag foireann Oireachtas na Samhna! Tae ag a Trí atá á thabhairt acu ar ócáidí rialta gur féidir leatsa páirt lárnach a ghlacadh iontu. Is go náisiúnta agus go seachtainiúil atá sé i gceist daoine a spreagadh chun glaoch chuig a gcuid comharsan.
Is go cúramach i bhfianaise shrianta an choróinvíris a mholfaí a leithéid a dhéanamh — cupán tae a ól leo ina ngairdín, fís-chomhrá a bheith acu leo, nó imeacht chomh fada le doras a dtí chun beannú dóibh! Tá póstaeir leagtha amach ag Bróna ón eagraíocht, más mian leat an scéal a scaipeadh i do cheantar féin. Déan teagmháil léi brona@antoireachtas.ie
Dán an Domhnaigh….
Ba mhaith linn an dán, “Imirce” a roinnt libh mar chuid den tsraith “Dán an Domhnaigh”. Scríobh Séamus Ó Liatháin é. #LeChéile
Posted by Foras na Gaeilge on Dé Domhnaigh 19 Iúil 2020
Imeacht ann féin é bheith ag fanacht ar Dhán an Domhnaigh ó Fhoras na Gaeilge, agus gormacha an Luain ar leac an dorais! Ní deas an smaoineamh a bheith ag filleadh ar an oifig agus seachtain oibre romhat amach, ach is deas an nós féachaint ar leathanaigh an Fhorais ar na meáin shóisialta, áit a roghnaíonn siad dán faoi leith gach Domhnach. Tugtar na línte an dáin, cúlra an phíosa agus blúire eolais faoin bhfile chomh maith. ‘Imirce’ le Séamus Ó Liatháin a roghnaíodh inné!
Muireann Nic Amhlaoibh, Dónal O’Connor agus Gerry O’Beirne //beo ar-líne Dé Sathairn óna 20:30, ar líne
…agus ar deireadh, dáta don dialann: SEAC an tSathairn, ócáid eagraithe ag lucht an Séamus Ennis Arts Centre, (is do sin a sheasann na litreacha)! Dé Sathairn beag seo beidh na ceoltóirí Muireann Nic Amhlaoibh, Dónal O’Connor agus Gerry O’Beirne le chéile i stiúideo aitheanta Windmill Lane i mBaile Átha Cliath. Is féidir leatsa iad a fheiscint ar do theilifís aige baile, nó pé gléas cliste atá agat, ach ticéad a cheannach roimh ré!
