Ceolchoirm le MAĊA agus imeachtaí eile

Ranganna sean-nóis le Doimnic Mac Giolla Bhríde // as seo go dtí an 5ú Samhain, uair sa tseachtain, ar líne

Mór an trua nach bhfuil an tOireachtas le bheith ar siúl mar is ceart i mbliana. Má tá tú lag gan é, bí ar an eolas go bhfuil duine de bhuaiteoirí Chorn Uí Riada, Doimnic Mac Giolla Bhríde ag múineadh ranganna sean-nóis ar líne, ach gan aon chostas le freastal orthu. Is eagraithe ag Cultúrlann McAdam Ó Fiaich atá siad agus cuireadh tús leo an tseachtain seo – leanfaidh siad ar feadh cúig seachtaine eile agus is ar Zoom a dhéanfar iad. Dhá sheisiún 40 nóiméad atá i gceist agus más áil leat a bheith i measc a chuid daltaí, seol teachtaireacht chuig Fionnuala ag fionnuala@culturlann.ie

Coirm le Caoimhín Ó Raghallaigh agus Cormac Begley // Dé Céadaoin 30 Meán Fómhair @ 20:00

Tá coirm speisialta eagraithe ag Ceol Áras Náisiúnta na hÉireann agus Cultúr Éireann a mbeadh suim ag léitheoirí NÓS ann, dar liom. Beidh na ceoltóirí oilte Caoimhín Ó Raghallaigh agus Cormac Begley le clos ag seinnt i dteannta a chéile agus go haonarach ag coirm a bheidh ar siúl Dé Céadaoin. Má cheanaíonn tú ticéad chun an seó a fheiscint (ar líne), mairfidh do thicéad ar feadh 24 uair a chloig i ndiaidh na coirme más mian leat féachaint air in athuair! Is féidir do thicéad a cheannach ar an leathanach seo.

Coirm an bhanna Maċa // leathanach Facebook an banna, Dé Sathairn 30 Meán Fómhair @ 21:00

Ba iad na deirfiúracha Mhic Cárthaigh a bhuaigh an chéad sraith de Réalta agus Gaolta, an clár tallainne a craoladh ar TG4, siar sa bhliain 2018. Tá siad (Ciara, Naoise agus Saoirse) ag treabhadh leo ó shin i ngort an cheoil! Maċa a thugann siad orthu féin anois agus tá an domhan siúlta acu lena gcuid ceoil. Chaitheadar tréimhse fiú mar cheoltóirí rialta sa tigh tábhairne Raglan Road, in Orlando, Florida, cúpla samhradh ó shin. Tá tacaíocht á lorg acu faoi láthair d’albam nua atá á chur le chéile acu, agus anuas ar sin beidh coirm á shruthú beo acu ar a leathanach Facebook. Má chuireann tú teachtaireacht chucu roimh ré, glacfaidh siad le hiarratais!

Oíche Chultúir, Club Chonradh na Gaeilge, féach siar air….

Bhí caint againn ar NÓS an tseachtain seo caite faoi imeachtaí don Oíche Chultúir – chuir Conradh na Gaeilge scoth na siamsaíochta ar fáil – idir fhilíocht agus cheol. Bhí leithéidí Róisín Seoighe, Junior Brother, Andrew Jackson, TADHG, Colm Mac Con Iomaire, Ruairí Ó Fríl, Ciara Ní É, Sam Ó Fearraigh, agus go leor leor eile le feiscint. Is féidir leatsa féachaint siar air más mian leat ach gliogáil ar an nasc seo

Will We Be Brilliant or What, coirm bheo le John Spillane (ar líne), Déardaoin 1 Deireadh Fómhair @ 21:00

An gcreidfeá gur sa bhliain 2002 a cuireadh amach an t-albam, Will we be Brilliant or What le John Spillane. Is cuimhin liom féin go maith an dlúthdhiosca a cheannach i siopa Roxy Records i dTrá Lí agus amhráin áirithe as a chur ar siúl ar repeat seasta… Magic Nights in the Lobby Bar, cuirim i gcás, nó The Dance of the Cherry Trees. Tá deis agaibh an Déardaoin beag seo, éisteacht le John agus a bhanna, le gach amhrán ón albam á chur acu i do láthair mar chuid d’ócáid ar-líne atá eagraithe aige. Is i dtigh an cheoil, DeBarra’s i gCloch na Coillte a bheidh sé, ach má théann tú féin chomh fada le johnspillane.ie chun ticéad a fháil, d’fhéadfá an choirm ar fad a fheiscint ó do sheomra suite!