Tá an t-ealaíontóir, dealbhóir, agus scríbhneoir Clíodhna Cussen ar shlí na fírinne. Ba í a rinne an dealbh de Phádraig Naofa ag Mám Éan i nGaeltacht na Gaillimhe chomh maith leis an ‘gCloch Fhada’ i lár Bhaile Átha Cliath. Rugadh Clíodhna ar an gCaisleán Nua i gcontae Luimnigh sa bhliain 1932 ach bhí cónaí uirthi le fada i mBaile Átha Cliath. Fuair sí a cuid ollscolaíochta i mBaile Átha Cliath agus in Firenze na hIodáile agus bhain sí a cáil amach mar dhealbhóir cré-umha agus cloiche.
Bhí sí pósta leis an bhfoilsitheoir Pádraig Ó Snodaigh agus bhí seisear clainne orthu – baill an bhanna ceoil Kíla Rónán agus Rossa Ó Snodaigh agus an Teachta Dála Aengus Ó Snodaigh ina measc. Bhuaigh Clíodhna duaiseanna go leor dá saothar dealbhóireachta i gcaitheamh a saoil, duais ó Oireachtas na Gaeilge ina measc.
Is iomaí leabhar a scríobh sí freisin, idir leabhair do pháistí, leabhair staire, agus cnuasaigh filíochta. Ba é comhlacht a fir céile Coiscéim a d’fhoilsigh go leor dá cuid leabhar, go mór mór le 30 bliain anuas. Bhuaigh a leabhar Soraidh Slán duais Oireachtais in 1993.
