Tá biorán nua Gaeilge do Fhéile an Bhróid deartha ag an ealaíontóir Catherine Greaney agus geallúint tugtha uaithi go rachaidh €2 de phraghas gach biorán i dtreo Belong To You, eagraíocht a thugann tacaíocht do dhaoine óga LADT.
Tá an biorán nua mar chuid de shraith a thosaigh Catherine lena gnó ‘Nine Arrow’ i mbliana le ceiliúradh a dhéanamh ar an nGaeilge agus ar fhéilte éagsúla na bliana. D’eisigh sí bioráin do Lá Fhéile Bríde agus do Lá Fhéile Pádraig níos luaithe i mbliana agus d’fhógair biorán an Bhróid an tseachtain seo in éineacht le biorán don fhéile Bealtaine agus do Lá na mBeach a bheidh ar siúl amárach.
View this post on Instagram
Cruth Fháinne an Chladaigh atá ar an mbiorán nua don fhéile Bród agus dathanna an tuair ceatha – nó dathanna na brataí Bróid – air. An cairdeas, an grá, agus an dílseacht na téamaí a shamhlaítear le Fáinne an Chladaigh agus aithnítear mar shiombail don Éireannachas trí chéile é freisin.
Tá sé i gceist ag Catherine priontaí den íomhá a chur ar ceant ag tús mhí an Mheithimh freisin.
Tá Catherine ag foghlaim na Gaeilge tríd an ealaín le cúpla bliain anuas. Deir sí go ndearna sí staidéar ar an nGaeilge ar scoil ach nár fhill sí ar an teanga go dtí gur léigh sí leabhar Dharach Uí Shéaghdha, Motherfoclóir. Spreagadh í tabhairt faoin nGaeilge arís agus thosaigh sí togra ealaíne le cabhrú léi ar a haistear teanga. Tarraingíonn sí pictiúir d’fhocal agus d’fhrásaí Gaeilge a tharraingíonn a haird agus thosaigh sí á ndíol ar líne go gairid ina dhiaidh sin.
Tá roinnt mhaith íomhánna d’ainmhithe, éin, agus feithidí déanta ag Catherine ó shin agus dúirt sí an tseachtain seo gur theastaigh uaithi cuid acu sin a chur ar fáil mar bhioráin. Chuige sin a roghnaigh sí a híomhá den bhumbóg a chur ar bhiorán do Lá na mBeach (20 Bealtaine).
View this post on Instagram
Beidh biorán eile don fhéile Bealtaine ar fáil ón lá amárach freisin.
Is féidir earraí Catherine, idir bhioráin, phriontaí agus eile a cheannach ar Nine Arrow.
