‘Gile, brí agus anam’ curtha i gCorca Dhuibhne ag ealaíontóir as an Min Aird

An aithníonn tú an fear seo thíos?

An Fear Marbh, le Ciara Dorgan

Cé eile ach An Fear Marbh, agus clóca ildaite á chaitheamh aige ón bhfuacht, clóca a cuireadh le chéile i Min Aird Thoir i Lios Póil, mar a gcónaíonn dearthóir a éide, an t-ealaíontóir comhaimseartha Ciara Dorgan. 

Tá Ciara bogtha abhaile ón Meánoirthear le cúpla mí, mar a raibh sí ag múineadh, agus dála beagnach gach tír eile ar domhan, bhí pobal Dubai faoi dhianghlasáil. Thug an dianghlasáil chéanna ar Chiara tosnú ar an bpéinteáil arís – nós a bhí aici ó bhí sí ina cailín óg, cé go mbíodh sí ag teacht is ag imeacht uaidh.

Thug pictiúir a tharraing Ciara dá cara buan Keady Clifford, atá imithe ar shlí na fírinne agus a bhronn sí ar a muintir, ana-spreagadh di scaoileadh faoin obair athuair leis. 

An uair seo, má tá, ní haon chaitheamh aimsire é, agus í scaoilte fén bpéinteáil go lánaimseartha le linn a sosa gairme ón múinteoireacht. Tá bailiúchán breá daite curtha ar a suíomh idirlín nua aici le cúpla lá anuas. 40 píosa ar fad atá ann, cuid acu ceannaithe cheana féin agus an uile cheann acu eisíoch.

Baineann bean Lios Póil úsáid as trí cinn d’ábhair sna píosaí atá déanta aici ar chanbhás: gealra, aicriligh agus scragall a dtugtar Gold Leaf air, atá ana ana-leochaileach agus ana-chostasach le ceannach.

Dúirt Ciara le NÓS, gur bheartaigh sí na gnáthdhathanna a bhaineann leis an dtírdhreach a sheachaint agus í i mbun péinteála, mar go bhfuil tarrac ar phictiúirí dá leitheidí siúd ar fáil. 

Theastaigh uaithi “gile, brí agus anam” a chur sa dúthaigh, a dúirt sí, agus is chuige sin a chinn Ciara dathanna an bhogha sín a thaispeáint dúinn ina cuid pictiúirí. Táid i mbolg ocrach an Fhir Mhairbh, ar chlocha fliucha Chaisleán na Mine Airde agus ar bhánta dúchasacha an Triúir Deirféar aici. 

Tá sólás le braistint ó na dathanna geala in am an dóláis, dar le Ciara, agus creideann sí go mór i dteiripe a bhaineann le dathanna a úsáid. Creideann sí leis, ná fuil gá ag duine ach a súile a oscailt agus féachaint ina dtimpeall, chun spreagadh a fháil dul i mbun an rud is ansa leo ar domhan, agus do Chiara, sin í an phéinteáil. 

Ar na healaíontóirí is deise léi, tá Lola Donoghue na Gaillimhe agus bean óg an Daingin, Elouise Flannery.I mí Feabhra seo chugainn, tá súil ag Ciara Dorgan bailiúchán nua a bheith ar taispeáint agus le ceannach óna suíomh www.ciaradorganart.com mar a bhfuil a bailiúchán ‘West Kerry’ faoi láthair. Beam ag súil go mór leis sin. Gura fada buan í, agus éinne a thugann cosán nua orthu féin sa tsaol!