Rang Beag Scríbhneoireachta, eagraithe ag Cló Iar-Chonnacht, gach Céadaoin ón 27 Bealtaine
Tá ‘Rang Beag Scríbhneoireachta’ á eagrú ag Cló Iar-Chonnacht, uair sa tseachtain ón gCéadaoin seo chugainn ar aghaidh! Is i gcomhar le meitheal d’aoi-scríbhneoirí atá an tsraith seo de cheachtanna curtha ar bun. Cuirfear físeáin ghairide de na haíonna – Áine Durkin, Áine Ní Ghlinn, Anna Heussaff, Alex Hijmans agus Réaltán Ní Leannáin – in airde agus leideanna á dtabhairt acu faoi chúrsaí scríbhneoireachta. Beifear ag leagan béim ar ghnéithe éagsúla den gceird i ngach eagrán agus tiocfar orthu ar shuíomh idirlín Chló Iar-Chonnacht, nó ar na leathanaigh atá acu ar na meáin shóisialta agus YouTube.
Ócáid ar-líne, eagraithe ag Borradh, Déardaoin 28 Bealtaine
Cuireadh tús le líonra sóisialta nua do lucht gnó le Gaeilge, ní rófhada ó shin – ‘Borradh’ a tugadh air. Eagraíodh cúpla ócáid chun deis a thabhairt do dhaoine in earnáil an ghnó, aithne a chur ar a chéile, sula gcuireadh cúrsaí as riocht le Covid-19. Tá beartaithe ag bunaitheoir na heagraíochta, Dáithí de Buitléir, áfach, an chéad ócáid eile a bhogadh ar-líne.
Is ar an Déardaoin seo chugainn (28 Bealtaine) a bheidh sé ar siúl, agus an t-ábhar a bheidh faoi chaibidil ná na dúshláin ghnó atá roimh dhreamanna difriúla, mar thoradh ar an gcoróinvíreas. Na cainteoirí a roinnfidh a scéalta féin, ná: Aoife Hendrick, stiúrthóir RTÉ Home School Hub, Macalla Teo, Pádraic Ó Griallais, Príomhfheidhmeannach Micil Distillery agus Mícheál Ó Foighil, Bainisteoir Choláiste Lurgan. Níl ach tuairim is 100 ticéad ar fáil don imeacht seo (gan aon chostas orthu), agus beidh tú in ann ceann a fháil ach cuairt a thabhairt ar Borradh.ie
Teach le Chéile de chuid Ghael Linn, gach Déardaoin @ 18:00
Is fiú súil a chaitheamh ar ‘Teach le Chéile’, sraith físeán atá á craoladh beo ag Gael Linn ar a leathanach Facebook, uair sa tseachtain! Tarlaíonn a leithéid gach Déardaoin ag a 18:00, agus bogtar ó theach go teach gach seachtain. Tugtar cuairt ar thithe le hamhránaithe, ceoltóirí agus scéalaithe a bhfuil cáil orthu! Go dtí seo tá cuairt tugtha acu ar láthair chónaithe Pheadair Uí Riada i gCorcaigh agus ar Ghaoth Dobhair, áit a bhfuil Máire Ní Choilm ag cur fúithi mar aon le cuairt ar an scéalaí Pádraig Ó Briain. Mura n-éiríonn libh féachaint ar na físeáin ar an lá, ná bí buartha, mar go gcuirtear físeán in airde tar éis an imeachta.
Coirm le Máiréad Ní Mhaonaigh, eagraithe ag Cultúr Éireann
Bhí caint agam an tseachtain seo caite ar an leathanach seo, ar an tsraith #IrelandPerforms, eagraithe ag Cultúr Éireann. Bhíos ag insint daoibh go mbeadh Ciarán Ó Maonaigh agus Caitlín Nic Gabhann le feiscint i mbun an cheoil ar leathanach Facebook Chultúr Éireann, agus do bhí leoga! D’éirigh go maith leis an gcoirm.
An Domhnach beag seo, is í Máiréad Ní Mhaonaigh, aintín Chiaráin a bheidh le clos i lár an lae. Is féidir a bheith ina teannta, ach cuairt a thabhairt ar an leathanach Facebook seo @ 15:30.
Beo ar Éigean, RTÉ Radio 1 Dé Sathairn 23 Bealtaine @ 20:00
Táim féin, Áine agus Siún ar bís go bhfuil ár bpodchraoladh Beo ar Éigean le bheith ar RTÉ Radio One i rith an tsamhraidh. Craolfar an chéad eagrán amárach ag a hocht a chlog sa tráthnóna! Má bhíonn sibh díomhaoin, cas air an raidió!
