Féile na Gealaí agus ceithre imeacht eile

Féile na Gealaí, Ráth Chairn 14-16 Meitheamh ‘19

Tá an t-am sin sa samhradh buailte linn arís, agus oilithreacht bhliantúil go Ráth Chairn na Mí ag teannadh linn, do cheann des na féilte is mó a mbím ag súil leo ó thús na bliana! Táim ag leanúint an mheitheal oibre ar na meáin shóisialta le tamall anuas agus iad ag prapáil do dheireadh seachtaine Fhéile na Gealaí. Tá siad i mbun péinteála; tá ceoltóirí á ndeimhniú acu; agus blaiseadh á thabhairt acu dúinn don mbia breá a bheidh le blaiseadh thíos ann! 

Tá sé ar nós a bheith mar chuid den bhfoireann agus go deimhin an próiseas, agus moladh tuillte acu as sinn a thabhairt ar an réamhthuras áirithe sin. Tá moladh ag dul don lucht eagraithe chomh maith, as na gnéithe nua agus breis imeachtaí atá beartaithe acu i mbliana. Rave Bricfeasta le Disco Anocht, Scóráil Sciobtha, Lá Teaghlaigh agus fiú láthair speisialta campála dóibh siúd a bheidh ag tabhairt a gcuid páistí leo. Gan trácht ar an gceol agus siamsaíocht a bheidh i gclub na háite, An Bradán Feasa. Cífidh mé ann sibh – níl an aimsir geallta go rómhaith dála an scéil – beir libh na buataisí!

Seoladh albam nua Threasa Ní Mhiolláin, Lán Mara, Club an Ghóilín, Club na Múinteoirí, Cearnóg Pharnell 14 Meitheamh @ 21:00

Anocht a sheolfar albam nua dúbailte an cheoltóra Treasa Ní Mhiolláin, san Ardchathair. Lán Mara an teideal air, agus tá meascán d’amhráin i mBéarla agus i nGaeilge air. Tá tionlacan ceoil le clos ar chuid de na rianta ó Shaileog Ní Cheannabháin, Diarmaid Ó hAlmhain, Freda Nic Giolla Chatháin, Neil Ó Lochlainn, Locko Cullen, agus Deirdre Ní Chonghaile.  

Ba é an ceoltóir agus léiritheoir Jack Talty a dhein cuid den taifead, i gceann de na séipéil is sine in Éirinn, Séipéal Eochla in Árainn; láthair speisialta. 

Is ar láthair eile speisialta, Club na Múinteoirí ar Chearnóg Parnell a bheidh Treasa anocht nuair a sheolfaidh Cathal Goan a saothar go hoifigiúil. Táim cinnte go mbeidh cúpla amhrán le clos uaithi féin agus iad siúd a bheidh i láthair tar éis an tseolta!

Comhghairdeas ó chroí léi ar an albam seo, 30 bliain ó d’eisigh sí a chéad albam aonair, An Clochar Bán, siar sa bhliain 1989. Seolfar é chomh maith i rith na míosa seo chugainn ag Scoil Samhraidh Willie Clancy i gContae an Chláir – bí ag faire ar an leathanach seo do na sonraí ar fad!

‘Ealaín Fiáin, Dúisigh do Dhúchas’, An Ghráig, Corca Dhuibhne, Co. Chiarraí, 14-16 Meitheamh 2019

Ta teacht le chéile suimiúil beartaithe don deireadh seachtaine ar an nGráig, ar leithinis Chorca Dhuibhne. Beidh deis ag rannpháirtithe iad féin a thumadh go hiomlán i nithe a bhaineann lenár gcultúr agus leis an spioradáltacht ar an nDíseart Gaelach seo, ar a dtugtar Ealaín Fiáin. Spreagfar iad siúd a bheidh i láthair chun a gcuid cruthaitheachta a mhúscailt trí mheán na Gaeilge.

Is í an scríbhneoir, taibhealaíontóir agus gníomhaí Siobhán de Paor atá ar dhuine do lucht eagraithe na hócáide seo, mar aon leis an luibheolaí Cearbhuil Ní Fhionnghusa agus Diarmuid Lyng, tráchtaire spóirt, cainteoir spreagúil agus iar-iománaí de chuid Loch Garman.

€250 an costas don deireadh seachtaine le lóistín (suanlios) agus béilí (le bia orgánach agus atá oiriúnach dóibh siúd nach n-itheann feoil) san áireamh.

Arcanadh, Ionad na gCuairteoirí, An Fál Carrach, Dé hAoine 14 Meitheamh @ 20:00

Is breá an ceol atá ag an mbanna Arcanadh agus beidh deis acu siúd a bheidh i nDún na nGall an Aoine seo, iad a fheiscint i mbun a gceirde. Meascán do cheol traidisiúnta, bluegrass agus ceol dúchasach a d’fhéadfá a thabhairt ar stíleanna ceoil an ghrúpa seo atá tar éis a bheith ag seinnt le chéile le fada, in Éirinn agus timpeall an domhain mhóir. Sinéad Gibson agus a fear céile Colm Breathnach atá sa bhanna, mar aon leis an deartháir agus deirfiúr, Martin agus Mags Gallen, Maria Corbet agus Fiona Walsh.

Róisín Elsafty, Ronan Browne agus Siobhán Armstrong, Tigh Farmleigh, BÁC, Dé Sathairn 15 Iúil @ 15:00

Róisín Elsafty, Ronan Browne agus Siobhán Armstrong an triúr a bheidh le clos i dTigh álainn Farmleigh ar thailte Pháirc an Fhionnuisce, an Satharn seo. Is i lár an lae a bheidh an choirm seo ar bun, óna trí a chlog, agus ticéid ar fáil ach gliogáil ar an nasc Eventbrite seo. Gach rath orthu!