Féile vinile Dhún Laoghaire // Ionaid éagsúla i nDún Laoghaire, 1-3 Samhain
Is i mbun ceiliúrtha ar vinil a bheidh rannpháirtithe na féile seo a bheidh ar siúl i nDún Laoghaire ag an deireadh seachtaine. Seo an dara bliain den Vinyl Festival, agus tá sraith de chainteanna agus de sheimineáir geallta.
Labhróidh príomhamhránaí The Hothouse Flowers, Liam Ó Maonlaí, mar gheall ar an gcéad albam a d’eisíodar, People: mar a scríobhadh agus mar a taifeadadh é. Beidh baill an ghrúpa The Horslips – Jim, Barry agus Johnny – ag seinnt mar chuid den gclár chomh maith.
Ceann de na haisteoirí is ansa liom féin ná Vicky McClure a chonac sa tsraith This is England an chéad lá riamh – agus a chuaigh i bhfeidhm go mór orm. Beidh sí féin agus a páirtnéir, an stiúrthóir, scríbhneoir agus aisteoir Jonny Owen ann agus iad ag labhairt ar an gceol is mó a bhfuil cion acu air; beidh siad ina ndioscmharcaigh níos déanaí sa tráthnóna chomh maith agus seit á sheinnt acu.
Gach eolas ó vinylfestival.ie
Lá Idirnáisiúnta na bPíob Uilleann // Mórthimpeall an domhain, Dé Sathairn 2 Samhain
Déanfar ceiliúradh ar na Píoba Uilleann in Éirinn agus mórthimpeall na cruinne Dé Sathairn seo, Lá Idirnáisiúnta na bPíob. Seo an 9ú mbliain go bhfuil a leithéid de chomóradh beartaithe.
Eagraíodh tuairim is leathchéad ócáid anuraidh timpeall an domhain mhóir agus déanfar amhlaidh i mbliana chomh maith. Tá cainteanna, taispeántais, seisiúin, ceardlanna agus go leor eile le bheith ar bun. Tá fáilte romhat féin, más spéis leat ócáid a eagrú, sin a dhéanamh ach teagmháil a dhéanamh le info@pipers.ie
Tá borradh faoi líon na n-imeachtaí agus gheobhaidh sibh blaiseadh do gach atá eagraithe go dtí seo, ar an leathanach seo!
SLIOCHT // Cló Iar-Chonnacht, An Spidéal, Co. na Gaillimhe, Dé Sathairn 2 Samhain @ 16:00
‘SLIOCHT’ is teideal d’ócáid a bheidh ar siúl i siopa Chló Iar-Chonnacht an Satharn seo. Léifidh triúr scríbhneoirí aitheanta a gcuid saothar do lucht éisteachta/féachana sa siopa leabhar agus ceoil atá ag na foilsitheoirí sa Spidéal. Sin iad Eithne Ní Ghallchobhair, Réaltán Ní Leannáin agus Alan Titley.
Beidh deis chomh maith acu siúd a bheidh i láthair ceisteanna a chur ar na húdair más áil leo é. Seolfar chomh maith an t-úrscéal is déanaí ó pheann Mhichíl Uí Chonghaile, ‘Sa Teach Seo Anocht’, roimh dheireadh na hócáide.
Ranganna Sean-Nóis le Doimnic Mac Giolla Bhríde // Áras Mhic Reachtain, Béal Feirste, Dé Céadaoin 6 Samhain @ 19:00 & gach Céadaoin feasta
Bíonn máistir an tsean-nóis, buaiteoir Chorn Uí Riada 2009, Doimnic Mac Giolla Bhríde, ag múineadh ranganna sean-nóis in Áras Mhic Reachtain uair sa tseachtain!
Gach Céadaoin a bhíonn a leithéid ar bun ar feadh uair an chloig. Ní gá go mbeadh scil faoi leith agat sa chúram, cuirtear fáilte roimh chách! £5 an táille.
Four Men and a Dog // Ionad Cultúrtha an Dochtúir Ó Loingsigh, Baile Bhuirne, Co. Chorcaí, Dé hAoine 8 Samhain @ 20:00
Bíonn ana-cheol ar fad san Ionad Cultúrtha i mBaile Bhuirne! D’fhoilsíodar le déanaí Clár an Fhómhair agus ana-chuma go deo air, glac uaim é. Sampla amháin de sin, ná coirm na hAoine seo chugainn leis an mbanna aitheanta Four Men and a Dog. Sin iad gan dabht Cathal agus Stephen Hayden, Gino Lupari, Dónal Murphy agus Kevin Doherty!
Coimeád súil ar shuíomh an ionaid – beidh Cormac Begley, Caoimhín Vallely, Conall Ó Grada, Maighréad agus Muireann Ní Luasaigh i measc na n-aíonna ceolmhara a bheidh chucu i rith mhí na Nollag.
