Gig for Gav agus ceithre imeacht eile

Nóta Stóta, Ionad an Dr. Ó Loingsigh, Baile Bhuirne, Dé hAoine, 29 Márta @ 20:30

Beidh meascán de cheol, dhraíocht, pholcaí agus phúcaí le feiscint i mBaile Bhuirne anocht, mar go léireofar an seó Nóta Stóta ar ardán in Ionad an Dr. Ó Loingsigh. Beidh Benny McCarthy (cairdín/ orgán béil), Conal Ó Gráda (fliúit/orgán béil) agus Des Dillon (puipéid/orgán béil) le feiscint sa seó físiúil ceolmhar seo, a dfhás as comhthionscadail idir an grúpa traidisiúnta The Raw Bar Collective, dream puipéid Teac A Blac agus an seó drámata Mag Mell. Beidh an grúpa ag seinm ceoil do na síoga, deirtear liom… am suí leis na sídhe!

Seoladh Polcaphonc i mBéal Feirste, Cultúrlann MacAdam Ó Fiaich, Bóthar na bhFál, Dé Sathairn 30 Márta @ 15:00

Is i mBéal Feirste a sheolfar Polcaphonc i rith an lae Dé Sathairn. Leabhar gleoite le Doimnic Mac Giolla Bhríde, a bhfuil dlúthdhiosca ag dul leis, le hamhráin agus dánta air. Beidh léitheoirí óga in ann iad a leanúint, mar go bhfuil na liricí sa bhfoilseachán chomh maith, mar aon le híomhánna tarraingteach atá curtha le chéile ag Dara McGee. Lynette Fay a sheolfaidh ag a trí a chlog amárach!

Continuum, Taispeántas le Barry Kerr, Amharclann Smock Alley Dé Sathairn 30 Márta @ 19.30

Is í Bláthnaid Ní Chofaigh a osclóidh taispeántas an ealaíontóra Barry Kerr Dé Sathairn beag seo. Taispeántas faoi leith atá i gceist, a bhfuil pictiúir mar chuid de agus amhráin nua-chumtha chomh maith. Continuum an teideal atá air. Is íomhánna ó línte agus ó scéalta na n-amhrán, a bheidh ar crochadh; agus beidh na hamhráin iad féin á gcanadh ar an oíche. Orthu siúd a chuirfidh an saothar i láthair an phobail, beidh Barry é féin, Síle Denvir, Muireann Nic Amhlaoibh, Pauline Scanlon, Niall Hanna, Niamh Dunne agus Seán Óg Graham. Mairfidh an seoladh ina iomláine ar feadh tuairim is uair an chloig. Is sa phríomhspás in Amharclann Smock Alley a bheidh sé ar siúl.

Léamh le Pádraic Breathnach, Siopa Leabhar Chló Iar-Chonnacht, An Spidéal, Dé Luain 1 Aibreán @ 17:30

Tá tús á chur ag Cló Iar Chonnacht le sraith nua imeachtaí, ina mbeidh scríbhneoirí éagsúla ag léamh sleachta as a gcuid saothar, don bpobal. Is i siopa an chomhlachta sa Spidéal a bheidh sé ar bun agus is ar an Luan a chuirfear tús leis! ‘Scríbhneoir na Míosa’ atá á thabhairt acu air, agus is é Pádraic Breathnach an chéad aoi a bheidh leo. Ní hamháin go léifidh sé sleachta óna leabhar, ach labhróidh sé faoina chuid scríbhneoireachta chomh maith agus glacfaidh sé le ceisteanna uatha siúd a bheidh i láthair. Ní hamháin sin ach tá beartaithe ag CIC lascaine 50% a chur i bhfeidhm ar aon leabhar dá chuid a dhíolfar le linn mhí Aibreáin, ní hamháin sa tsiopa ach ar cic.ie chomh maith!

The Gig for Gav, Vicar St. Dé Luain, 1 Aibreán @ 20:30

Tá gig speisialta á heagrú don gceoltóir Gavin Ralston, a bheidh ar siúl Dé Luain seo chugainn. Is ag bailiú airgid don ngiotáraí agus léiritheoir aitheanta aidhm na coirme. Tá ailse ar Gavin agus do bheartaigh a chuid cairde a leithéid d’imeacht a chur ar bun chun airgead a bhailiú le híoc as cóir leighis. Go dtí seo, tá na ceoltóirí seo a leanas fógartha: The Waterboys, Sharon Shannon, PictureHouse, Mundy, Paul Harrington, Mary Black, Seamus Begley, Beginish agus Cormac Begley. Bláthnaid Ní Chofaigh a bheidh ina bean an tí (seachtain ghnóthach roimpi amach!)