Blaschúrsa lae sna teangacha Ceilteacha, An Lon Dubh, Dé Sathairn 28 Meán Fómhair @ 10:00
An bhfuil aon scil agaibh sna teangacha Ceilteacha? Ar mhaith libh frásaí bunúsacha a fhoghlaim nó snas a chur ar an méid atá agaibh? Beidh cúrsaí lae ar siúl amárach in An Lon Dubh, an bhialann atá i bhfoirgneamh nua Raidió Fáilte, i mBéal Feirste.
Díreoidh na múinteoirí ar Ghaeilge na hAlban, ar Ghaeilge Mhanann, ar an mbBreatnais, ar an gCoirnis agus ar an mBriotáinis i gcaitheamh an lae, uair a chloig do gach teanga. £15 an costas agus tá lón san áireamh sa táille sin. Má tá breis eolais uaibh, seol teachtaireacht chuig an seoladh seo carraigcelt@gmail.com chun clárú, srl.
Lá Mór Na Gaeil Óga 2019, Páirc Naomh Caitríona i Leamhcán, Dé Sathairn 28 Meán Fómhair @ 14:00
Tá lá mór spraoi beartaithe ag baill Na Gaeil Óga amárach i bPáirc Naomh Caitríona i Leamhcán. Tiocfaidh baill an chumainn le chéile ar an láthair do lá mór d’imeachtaí do chách, idir óg agus aosta. Beidh Ciarán Mac Fhearghusa ag múineadh ióga faoi scáth Óga Yoga; beidh ceol le clos; duaiseanna le buachtaint i gcrannchur; imeachtaí do naíonáin; péinteáil aghaidhe agus beidh veain ar an láthair, ag díol uachtar reoite. Tá súil agam go mbeidh an aimsir leo!
Seoladh an leabhair Miscellany 50, Fifty Years of Sunday Miscellany, Acadamh Ríoga na hÉireann, BÁC Dé Céadaoin 2 Deireadh Fómhair @ 18:30
Is breá liom a bheith ag éisteacht leis an gclár Sunday Miscellany ar RTÉ Radio 1. Seinntear aistí pearsanta raidió na léitheoirí a dhíríonn ar iliomad ábhar, le meascán deas ceoil fite fuaite tríd an gclár.
Tá sé ar an aer le breis is leath chéad bliain agus do bhí ceiliúradh ar bun ag criú an chláir anuraidh chun é seo a chomóradh. Tá cuid de na píosaí scríbhneoireachta seo anois le fáil i leabhar breá, foilsithe ag Island Press, dar teideal Miscellany 50, Fifty Years of Sunday Miscellany. Is í léiritheoir sraithe an chláir, Clíodhna Ní Anluain, eagarthóir an leabhair chomh maith
. I measc na n-údar sa bhailiúchán, tá Doireann Ní Ghríofa, Louis de Paor, Éilís Ní Dhuibhne, Simon Ó Faoláin, Nuala O’Connor, Kevin Barry agus scata, scata eile. Seolfar é in Acadamh Ríoga na hÉireann sa chathair Dé Céadaoin seo chugainn ag 18:30.
Ye Vagabonds, Ionad Cultúrtha, Baile Bhuirne, Déardaoin 3 Deireadh Fómhair @ 20:00
Tá Ye Vagabonds ainmnithe ar an ngearrliosta do na gradaim Folk de chuid an BBC agus de chuid RTÉ, treise leo. Bronnfar duaiseanna ar na ceoltóirí buacacha ag dhá ócáid i rith mhí Dheireadh Fómhair, nuair a bheidh searmanas bronnta ar siúl i Manchain Shasana agus i Sráid an Bhiocáire, Baile Átha Cliath. Roimhe sin ar fad áfach, beidh siad ó dheas i gCorcaigh in Ionad Cultúrtha an Dochtúir Ó Loinsigh, i mBaile Bhuirne.
Níl ansin ach ócáid amháin atá ar chlár an Fhómhair san Ionad Cultúrtha, tá leithéidí Doireann Ní Ghlacáin le Sarah agus John Flynn; filíocht le Séamus Barra Ó Súilleabháin agus Ciara Ní É; Four Men and a Dog agus Cormac Begley lena chuid cairde, i measc eile.
