An Concise English-Irish Dictionary ar fáil le réamhordú ón Siopa Leabhar anois

Tuairiscíodh an tseachtain seo caite ar Tuairisc.ie go bhfuil an Concise English-Irish Dictionary, an chéad mhórfhoclóir Béarla-Gaeilge le 60 bliain curtha i gcló agus súil ag lucht an fhoclóra é a bheith ar fáil an faoi dheireadh na míosa. 

Tá an Siopa Leabhar ar Shráid Fhearchair i mBaile Átha Cliath ag glacadh le réamhorduithe don fhoclóir nua ón lá inniu agus lascaine 6% ar fáil don té a ordóidh an leabhar sula mbeidh sé ar fáil sa siopa. €30 a praghas a bheidh ar Fhoclóir Uí Mhianánaigh nuair a bheidh sé sna siopaí maithe leabhar an mhí seo chugainn. 

30,000 ceannfhocal atá san fhoclóir nua atá bunaithe ar foclóir.ie, an foclóir Béarla-Gaeilge ar líne a seoladh seacht mbliana ó shin. Tá togra na foclóireachta ar cheann de na tograí Gaeilge is mó agus is uaillmhianaí a rinneadh le fada fada an lá, agus os cionn 48,000 ceannfhocal ar fáil sa bhfoclóir ar líne. 

Beidh os cionn 1,700 leathanach sa leagan clóite agus tuairiscíodh ar Tuairisc.ie gur cuireadh 8,000 cóip i gcló san Iodáil. Tá an Foras ag súil le feachtas poiblíochta a sheoladh sna míonna amach romhainn le hobair na foirne foclóireachta a phoibliú. 

Seo é an chéad fhoclóir dá leithéid a foilsíodh ó eisíodh English-Irish Dictionary Thomáis de Bhaldraithe in 1959.