‘Cré na Cille’ curtha ar fáil saor in aisce mar ríomhleabhar ag Cló Iar-Chonnacht

Tá an leabhar is mó cáil i saol na Gaeilge, Cré na Cille le Máirtín Ó Cadhain, curtha ar fáil saor in aisce mar ríomhleabhar ag an gcomhlacht foilsitheoireachta Cló Iar-Chonnacht. 

Tá an teach foilsitheoireachta, atá lonnaithe ar an Spidéal i gCois Fharraige, ag cur ríomhleabhar amháin ar fáil in aisce gach seachtain le linn na paindéime ar a siopa ar líne “le tacú le léitheoirí na Gaeilge atá sa mbaile faoi láthair” , agus tá gach ríomhleabhar eile ar lascaine. Beidh Cré na Cille ar fáil saor in aisce ó 13 Aibreán go 20 Aibreán. 

Níl le déanamh ag léitheoirí ar mhaith leo cóip a fháil ach dul go suíomh Chló Iar-Chonnacht, an ríomhleabhar a chur ina gciseán siopadóireachta agus é a ‘sheiceáil amach’. Gheofar ríomhphost ó CIC agus comhad ePub nó Mobi ann.

Is féidir le earraí Apple — an iPad, iPhone, iMac, iBooks srl — na comhaid ePub a léamh agus is féidir le Kindle na comhaid Mobi a léamh. Más Kindle atá agat, beidh ort seoladh ríomhphoist do Kindle a aimsiú ar do chuntas Amazon agus an comhad Mobi a sheoladh ar aghaidh chuige.

Is é Cré na Cille an saothar is mó cáil i saol na Gaeilge. Ghnóthaigh an t-údar, Máirtín Ó Cadhain, duais Oireachtais sa mbliain 1947 agus d’fhoilsigh Sáirséal agus Dill i bhfoirm leabhair é in 1950. 

Tá leaganacha eile de Cré na Cille ar fáil ó Chló Iar-Chonnacht freisin, ach ní féidir iad a fháil mar gheall ar scaipeadh an víris chorónaigh in Éirinn. Ar na leaganacha sin tá dhá leagan Béarla, eagrán nua den bhunleagan Gaeilge, roinnt aistriúchán i dteangacha eile an domhain, agus closleabhar.