Tá níos lú ná trí mhí le dul go dtí Oireachtas na Samhna agus tá ticéid mochóirí ar díol anois le haghaidh na mórfhéile.
Is i gCill Airne, Co. Chiarraí, a bheidh an gabhar á rostadh arís i mbliana agus táthar ag súil le slua mór a bheith i láthair idir an 1-5 Samhain.
€90 atá ar ollticéad na féile faoin bpraghas mochóirí, €75 atá ar thicéad dhá lá don Aoine agus don Satharn agus €45 atá ar thicéad dhá lá don Déardaoin agus don Aoine.
Is é an 29 Meán Fómhair an dáta a thiocfaidh deireadh leis na ticéid mochóirí agus tá muintir an Oireachtais ag moladh do dhaoine na scuainí a sheachaint agus ticéad a fháil chomh luath agus is féidir.
Beidh an gnáthmhéascán de chomórtais, d’imeachtaí agus de chomhluadar den scoth le fáil i gCill Airne i mbliana, cuir i gcás na príomhchomórtais amhránaíochta agus rince, seoltaí leabhar agus Pólca 4 beo ag Club na Féile.
Is féidir do thicéad a cheannach anseo.
