Tá níos lú ná ceithre seachtaine fágtha ag filí, drámadóir, agus scríbhneoirí cur isteach ar chomórtais liteartha Oireachtas na Gaeilge. Tá duaischiste €31,000 ann do na comórtais uilig agus réimse leathan rannóg ann.
Is é an 1 Iúil 2023 an dáta sprice d’iontrála ar na comórtais éagsúla: úrscéal, gearrscéal, ficsean d’fhoghlaimeoirí fásta, prós, filíocht, iriseoireacht, greannán, drámaíocht agus eile.
Léifidh painéal saineolaithe litríochta na hiarratais ar fad a chuirfear isteach ar na comórtais agus tabharfar aiseolas “fiúntach luachmhar” ar shaothar na scríbhneoirí.
Tá 15 rannóg ann do scríbhneoirí fásta agus 14 rannóg ann do scríbhneoirí óga – idir pháistí bunscoile agus mhic léinn ollscoile – agus duaiseanna chomh mór le €3,000 le buachan i gcuid de na rannóga.
Tá duais speisialta ann i mbliana do shaothar a dhéanfaidh cur síos ar athbheochan na Gaeilge ó 1893 go 2023 “leis na buaicphointí sonracha a thit amach le 130 bliain anuas” agus Conradh na Gaeilge ag ceiliúradh 130 bliain a bhunaithe i mbliana.
Is saothar neamhfhoilsithe amháin a ghlacfar leis i ngach comórtas – is é sin le rá nach nglacfar le haon mhír scríofa más rud é gur léiríodh go poiblí cheana é. Tá táille iontrála le híoc le haghaidh gach comórtais agus ní ceadmhach an saothar céanna a chur isteach ar níos mó ná comórtas amháin.
Is féidir cur isteach ar chomórtais anseo.
