Ola Majekodunmi ina hambasadóir ar Oíche Chultúir Bhaile Átha Cliath

Is Ola Majekodunmi, colúnaí de chuid NÓS, atá ina hambasadóir ar Oíche Chultúir Bhaile Átha Cliath 2021. Seoladh an fhéile chultúir, atá ar an bhfód le 16 bliain anuas, níos túisce inniu ar Lána na Saoirse i lár na hardchathrach. 

Beidh an fhéile aon oíche ar siúl ar an 17 Meán Fómhair agus tá clár leathan imeachtaí á mbeartú i láthair na huaire. Dúirt Ola le NÓS gur “onóir mhór” é a bheith ina hambasadóir ar Oíche Chultúir i mBaile Átha Cliath agus go bhfuil sí “ag súil go mór” le freastal ar na hócáidí éagsúla a bheith ar siúl an mhí seo chugainn. 

“Tá Oíche Chultúir an-tábhachtach dom, bainim sult as gach uile bhliain agus tá mé ag freastal ar imeachtaí ó bhí mé i mo chailín beag nuair a thosaigh an fhéile in 2006. Bhí baint ag mo mháthair le hOíche Chultúir nuair a bhí mé óg, agus í ag cur cultúr na hAfraice chun cinn i mBaile Átha Cliath. 

“Tá mé i m’ambasadóir áitiúil do Bhaile Átha Cliath agus beidh mé ag cur eolais faoin bhféile amach agus ag freastal ar go leor imeachtaí ar an oíche féin. Tá mé ag súil leis an ócáid ag bheidh ag an iris Comhar i nGarraithe Náisiúnta na Lus, agus beidh oíche filíocht ó bhéal san Axis i mBaile Munna. Chomh maith leis sin beidh céilí ag muintir Áras Crónáin i gCluain Dolcáin, mar sin beidh mé an-ghnóthach!,” a dúirt sí. 

https://twitter.com/olamajekodunmi1/status/1427583849689661452

Níl clár iomlán na féile ar fáil go fóill, ach tá imeachtaí á gclárú de réir a chéile agus eolas á scaipeadh ar na meáin shóisialta ag lucht Oíche Chultúir. Tá tuilleadh eolais ar fáil ar an suíomh idirlín atá dírithe ar an bhféile i mBaile Átha Cliath. 

Beidh imeachtaí eile ar siúl ar fud na tíre, agus tá clár speisialta á chur le chéile don Oíche Chultúir sa nGaeltacht. Bíonn imeachtaí na hOíche Cultúir ar fáil saor in aisce chuile bhliain agus is í an sprioc atá leis ná spéis an phobail a spreagadh sna healaíona agus sa gcultúr.