Siúlóidí gach Déardaoin le Na Cnocadóirí, Baile Átha Cliath
Inniu an lá is faide sa bhliain, agus deis againn le tamall súp a bhaint as gile na dtráthnónta. Uair sa tseachtain, tagann grúpa dar teideal ‘Na Cnocadóirí’ le chéile agus roghnaíonn bealach faoi leith a shiúlfaidh siad, i mBaile Átha Cliath agus an ceantar máguaird. Slí mhaith chun do thráthnóna a chaitheamh, i gcomhluadar na nGael! Is ar an Déardaoin a tharlaíonn a leithéid agus más spéis leat a bheith ina measc, seol teachtaireacht chuig cnocadoiri@gmail.com chun eolas na slí a fháil agus do spéis a léiriú!
Ranganna amhránaíochta le Inni-K
Diail an bhean í Eithne Ní Chatháin, nó Inni-K mar is fearr aithne uirthi ó thaobh an cheoil de. Tá sí ar tí tús a chur le ranganna amhránaíochta, ar líne, an tseachtain seo chugainn. Tá dhá chatagóir roghnaithe aici, amhránaíocht ar an sean-nós agus amhránaíocht traidisiúnta as Béarla. Is ar Zoom a bheith a leithéid ag tarlú, na haon Mháirt ón 23 Meitheamh, ar feadh ocht seachtaine. Is féidir le héinne tabhairt fúthu, ní gá go mbeadh scil faoi leith agat sa chúram! Tá cúpla spás fágtha, ach b’fhearr daoibh teachtaireacht a sheoladh láithreach más suim libh a bheith páirteach: eithnenichathain@yahoo.com
Half Moon Festival, 26-28 Meitheamh 2020, ar-líne
Cuirfear tús Dé hAoine seo chugainn le féile ealaíon ar-líne, dar teideal ‘Half Moon Festival’! Is iad mic léinn MA i mbainistiú na n-ealaíon agus an léiritheoireacht chruthaitheach in Ollscoil na hÉireann, Corcaigh atá á heagrú seo.
Cé nach féile Ghaeilge í seo, tá dhá ócáid Gaeilge beartaithe ag lucht a eagraithe. Cuirfidh Pax Ó Faoláin agallamh ar na filí Ailbhe Ní Ghearbhuigh, Darragh Ó Caoimh agus an cumadóir Criostóir Ó Loingsigh i rith ócáide dar teideal Dánta agus Duanta. Labhraidh sé leo faoina dtaithí ‘bheith ag cumadh as Gaeilge, mar aon le gnéithe eile de na healaíona teanga-bhunaithe in Éirinn. Beidh an seó grinn GaelGÁIRÍ ar bun chomh maith ar an Aoine chomh maith, le hAideen McQueen, Eddie Mullarkey, Eoin P. Ó Murchú agus Seán T. Ó Meallaigh! Beidh an dá ócáid sin ar bun Dé hAoine 26 Meitheamh. Táim féin go pearsanta ag súil le coirm an cheoltóra Síomha chomh maith, ar an 28. Tabhair cuairt ar an leathanach seo, do na sonraí ar fad.
Féile Sean-Nós Chois Life, Zoom, 26-28 Meitheamh
Dáta don dialann! Uair sa bhliain bíonn an fhéile amhránaíochta Sean Nós Chois Life ar siúl i mBaile Átha Cliath, ach ar nós go leor eile, tá an fhéile seo bógaithe ar líne chomh maith! Is le caoinchead agus cabhair ó An Góilín atá a leithéid ag tarlú. Beidh seisiúin agus ceardlanna amhránaíochta ar bun, mar aon le rince ar an sean nós agus lúibíní! Ní hamháin sin, ach bronnfar Gradam Sean-Nós Chois Life ar Sheosamh Ó Críodáin, fear uasal a bhfuil sé tuillte go mór aige!
