Féile na Bealtaine, An Daingean agus an ceantar máguaird, 2-6 Bealtaine 2019
Cuireann sé gliondar ar mo chroí filleadh abhaile go Corca Dhuibhne, go háirithe nuair a bhíonn a leithéid d’fhéile agus Féile na Bealtaine ar siúl. As seo go dtí an Luan, ní bheidh aon chúis ag muintir an bhaile, ná ag cuairteoirí chuige, a bheith díomhaoin. Féile Chultúir agus Ealaíona bhliantúil atá i gceist ina ndéantar ceiliúradh ar theacht na Bealtaine, le ceol, rince, ealaín, caint, drámaíocht agus siamsaíocht!
I mbliana ó thaobh an cheoil, beidh Kneecap, The Whileaways, Colm Mac Con Iomaire, Mick Flannery agus Ger Wolfe le clos, i measc eile. Déanfar taifead ar na podchraoltaí Beo ar Éigean agus Up to 90 sa bhaile agus beidh taispeántais ag Carol Cronin, Úna Ní Shé, Liam Holden, agus Elouise Flannery — gan ansin ach blaiseadh beag!
Anuas air sin beidh Ciara Ní É ag reic a cuid filíochta sa Chúirt, Pat Shortt sa Hillgrove, Lá na bPáistí i bpáirc an bhaile, Eilís Ní Dhuibhne faoi agallamh ag Áine Moynihan, agus léireofar dráma le Manchán Magan dar teideal Arán agus Im. Ní leor an t-alt seo chun cur síos a dhéanamh ar an réimse leathan imeachtaí, téir chuig an suíomh go ngeobhaidh sibh níos mó eolais fós faoi! feilenabealtaine.ie
Reic, Club Chonradh na Gaeilge, 6 Sráid Fhearchair, Déardaoin 2 Bealtaine @ 19:00
Tá Lá na Filíochta á cheiliúradh inniu. Beidh Ciara Ní É i gClub Chonradh na Gaeilge anocht (sula dtabharfaidh sí aghaidh ar an nDaingean), lena hócáid rialta, Reic. Oíche filíochta ilteangach ag a mbíonn fáilte chroíúil roimh an lucht féachana a gcuid cumadóireachta a reic!
Ba cheart go mbeadh deireadh leis an imeacht timpeall a deich a chlog, chun deis a thabhairt do gach éinne an bus deireanach abhaile a fháil!
An Taobh Tuathail, beo ón Róisín Dubh, Dé hAoine 3 Bealtaine @ 21:00
Comhghairdeas ó chroí le Cian Ó Ciobháin, tá sé féin agus a chlár raidió An Taobh Tuathail ag comóradh 20 bliain ar an bhfód! Ní beag an éacht é sin le bheith bainte amach!
Tá tuairim is 5,500 clár craolta aige agus deis tugtha aige do scata bannaí ceoil a gcuid saothar a chlos ar aerthonnta stáisiún náisiúnta mar aon le hardán cuí a thabhairt dóibh, i bhfoirm an chláir seo, a bhfuil lucht leanúna dílis, tiomanta aige.
Amárach, tabharfaidh Cian faoin Róisín Dubh i nGaillimh chun clár beo a dhéanamh ón láthair, áit a mbeidh bannaí ceoil ag seinnt mar chuid den mbeochraoladh seo. Sin iad Ships agus Mount Alaska. Tosóidh an clár beagáinín níos luaithe ná mar is iondúil ag 21:00 agus beidh tú in ann éisteacht leis beo ar RTÉ Raidió na Gaeltachta, nó beidh tú in ann a bheith i láthair ach ticéad a cheannach ar shuíomh an Róisín Dubh. Gach rath ar Chian agus an clár beo! Gurb fada buan iad.
The Conifers agus Skipper’s Alley, Áras Mhic Reachtain, Dé hAoine 3 Bealtiane @ 21:00
Mar chuid d’imeachtaí Fhéile Ealaíona Ceathrú na hArdeaglaise (The Cathedral Quarter Arts Festival), beidh dhá bhanna ceoil le feiscint in Áras Mhic Reachtain an Aoine beag seo. Sin iad The Conifers agus Skipper’s Alley – dhá bhanna le fréamhacha láidre traidisiúnta ina gcuid ceoil, atá go mór i mbéal an phobail le tamall anuas anois. Beidh ana cheol san Áras – bí leo más sa chomharsanacht thú, beidh tús á chur leis an gcoirm timpeall 21:00.
Féile Siúlóide, áiteanna éagsúla i gCiarraí, 3-5 Bealtaine 2019
Cuirfear tús ar an Aoine le Féile Siúlóide i gCiarraí ar a bhfuil an Kerry Camino Walking Festival mar theideal air. Féile í seo a mhairfidh ar feadh trí lá. Ar an gcéad lá rachaidh na rannpháirtithe ó Thrá Lí chuig an gCom; Ón gCom go hAbhainn an Scáil atá beartaithe don Sathairn agus ansin ar an nDomhnach is é An Daingean an ceann scríbe. Deis í seo chun radharcanna áille a fheiscint agus aithne a chur ar dhaoine nua chomh maith. kerrycamino.com le breis eolais a fháil
