Tá an chéad bhlaisín den scannán Arracht, a bheidh á thaispeáint den chéad uair ag deireadh na míosa seo in Tallinn na hEastóine, eisithe ag lucht a dhéanta.
Beidh an scannán nua Gaeilge, atá lonnaithe in aimsir an Ghorta Mhóir in iarthar na hÉireann, á thaispeáint mar chuid den fhéile scannán Black Nights (nó PÖFF mar a thugtar uirthi san Eastóin), mar a mbeidh 80,000 duine i láthair agus os cionn 250 scannán ar taispeáint. Roghnaíodh Arracht le bheith san iomaíocht i bpríomhchomórtas na féile, an Grand Prix.
Dúirt stiúrthóir an scannáin, Tom Sullivan, gur athraigh an scannán a shaol agus gur mór an onóir dó go mbeifear á thaispeáint den chéad uair ag an mórfhéile idirnáisiúnta.
“Chuaigh dúthracht na foirne i gcion go mór orm agus, ach go háirithe, chuaigh tiomantas Dhónaill Uí Héalaí [duine de na haisteoirí] don phróiseas i gcion go mór orm féin agus ar an gcriú go léir.
“Foireann den chéad scoth a bhí agam, a raibh orthu troid in aghaidh stoirm Atlantach faoi thrí chun Arracht a chur i gcrích. Táimid ar fad ar bís an scannán a sheoladh sa chathair álainn, Tallinn, agus i measc scannánóirí iontacha eile,” a dúirt sé.
Lonnaithe in 1845 atá an scannán nua, díreach sular loiteadh an tír le linn an Ghorta Mhóir. Tuigeann an t-iascaire Colmán Sharkey foscadh agus dídean do strainséir, ar achainí sagairt. Tagann deartháir Cholmáin, an t-iarshaighdiúir Patsy, abhaile ón gcoigríoch díreach roimh thús an Ghorta, agus téann an bheirt fhear le himpí ar an tiarna talún gan an cíos a ardú.
Is é an comhlacht Macalla Teo a léirigh Arracht le maoiniú ó TG4, Fís Éireann, agus Údarás Craolacháin na hÉireann.