Is féidir go leor rudaí a dhéanamh in dhá uair go leith. Is féidir leat éisteacht leis an albam Black Panther ó thús go deireadh faoi dhó. Is féidir leat breathnú ar chúig eipeasóid den chlár teilifíse Murder She Wrote. Is féidir leat suí i do sheomra ag breathnú amach an fhuinneog ag déanamh machnaimh ar na roghanna a rinne tú i do shaol, a thug go dtí an pointe seo thú. Bheadh ceachtar de na rudaí sin níos taitneamhaí ná breathnú ar Red Sparrow.
Tá cúpla dréacht de léirmheas ar an scannán seo scríofa agam ach ní raibh aon chiall le ceachtar acu, mar níl aon chiall leis an scéal féin. Go bunúsach, tosaíonn damhsóir bailé, Dominika (Jennifer Lawrence), ag obair mar spiaire do rialtas na Rúise tar éis di a cos a bhriseadh agus ar a céad mhisean buaileann sí le spiaire de chuid CIA, Nate Nash (Joel Edgerton), a dhéanann iarracht í a shaoradh ón Rúis agus í a thabhairt go Meiriceá. Tá rudaí eile a tharlaíonn sa scéal freisin, ach chuirfeadh na sonraí a chodladh thú.
Tá an scannán áirid sa gcaoi ina bhfuil sé casta agus clichéd ag an am céanna. Níl carachtair ar bith réalaíoch, tá chuile ghné den scéal dearmadach agus tá an scannán foréigneach agus gáirsiúil gan ghá.
Ó thaobh aisteoireachta de, bhí ionadh orm faoi chomh dona is a bhí chuile dhuine. Bhí na canúintí a bhí ag Jennifer Lawrence, Jeremy Irons agus Ciarán Hinds pianmhar le n-éisteacht leo. Bhí sé ar nós go raibh siad ar fad ag iarraidh aithris a dhéanamh ar Ivan Drago ó Rocky IV, agus go raibh comórtas acu ar cé acu a dhéanfadh an jab is measa. Níl a fhios agam ó thalamh an domhain cén fáth nár labhair siad ina gcuid canúintí féin má bhí siad ag dul Béarla a labhairt. Is aisteach an rud é le feiceáil i scannán go bhfuil formhór de na carachtair Rúiseach, nach labhraíonn aon duine Rúisis go dtí go labhraíonn an Meiriceánach Nate Nash le Dominika ar dtús. A leithéid de raiméis.
Má tá duine éigin ag cur iallach ort dul ag an scannán seo, agus mura féidir leat léim ar bhus in áit éigin, rud gur féidir leat a dhéanamh ná cluiche óil Red Sparrow a imirt. Tug buidéal fíona isteach leat sa bpictiúrlann, nó buidéal vodca má tá tú ag iarradh bheith níos Rúisí ná na carachtair ar an scáileán. Ansin, tóg deoch aon uair a shiúlann duine trí dhoras, aon uair a thugann carachtar clúdach litreach nó píosa páipéir le eolas tábhachtach air do charachtar eile nó aon uair a deir duine éigin cé chomh dathúil is atá Jennifer Lawrence. Tá mé ag rá leat go mbeidh an buidéal folamh taobh istigh d’uair an chloig, agus go mbeidh i bhfad níos mó spraoi agat sa bpictiúrlann ná mar a bhí agamsa.
