Táimid beagnach ag deireadh 2020 – ceann de na blianta is measa riamh. Ní féidir linn a rá go fóill go mbeidh 2021 níos fearr, ach le cúnamh Dé ní bheidh sí níos measa. Is cinnte nach mbeidh an Nollaig mar an gcéanna i mbliana. Beidh roinnt mhór dínn ag ceiliúradh lenár muintir ar Zoom, Skype agus FaceTime. Ach ná bí buartha, tá taitneamh mór fós le baint as scannáin Nollag.
I spiorad na Nollag aistí seo, ní dóigh liom gur cheart scannáin thraidisiúnta a mholadh. Ina n-ionad sin, seo chugaibh cúig scannán neamhthraidisiúnta do Nollaig 2020
Gremlins (1984), dir. Joe Dante
Suite i mbaile beag Meiriceánach le linn na Nollag, insítear in Gremlins scéal an déagóra Billy agus a pheata nua, Gizmo. Ach ní gnáthpheata atá ann, agus tá roinnt rialacha is gá a leanúint agus é ag tabhairt aire do Gizmo beag – ná tugtar bia dó i ndiaidh an mheán oíche, ná cuirtear faoi sholas geal é, agus ná fliuchtar é.
Is é Gremlins an scannán is sine ar an liosta seo, agus b’fhéidir gur rogha traidisiúnta é i roinnt teaghlach. Ach, leis na héifeachtaí speisialta, an greann ainrialta agus an t-uafás éadrom, seans maith ann go ndearna tú dearmad gur scannán Nollag amach is amach atá ann.
Happy Christmas (2014), dir. Joe Swanberg
Fiú go bhfuil réalta chomh cáiliúil le Anna Kendrick sa scannán seo, níl a fhios ag mórán daoine faoi agus is mór an trua é sin. Scéal réalaíoch agus suimiúil faoin aosacht, andúil agus féinamhras atá ann.
Leanann an scannán Jenny (Kendrick) agus í ag fanacht i dteach a dearthár le linn na Nollag. Is steiréitíopa foirfe an Mhílaoisigh í Jenny, gan stiúir ná aidhm cheart aici. Ach, le cabhair óna muintir, foghlaimíonn sí faoi na rudaí atá tábhachtach ina saol.
Krampus (2015), dir. Michael Dougherty
In Éirinn, bíonn ár dtraidisiúin Nollag sách gealgháireach agus bríomhar, den chuid is mó. Ach in áiteanna eile san Eoraip, bíonn rudaí beagáinín níos dorcha. Ceann de na traidisiúin is aistí ann ná an Krampus – arracht uafair na Gearmáine a itheann páistí dána.
Is é an t-arracht seo fócas an scannáin Krampus (murar thuig tú ón teideal). Insítear scéal teaghlach Meiriceánach agus a seanmháthair Ghearmánach. Nuair an insíonn sí scéal an Krampus dóibh, scaoiltear saor olc ollmhór chun an Nollaig a scrios.
Office Christmas Party (2016), dir. Josh Gordon, Will Speck
Ní beidh éinne ag cóisir oifige i mbliana. B’fhéidir go bhfuil faoiseamh ort nach mbeidh ort comhrá a beidh agat le do ceannasaí, agus sibh ag caitheamh geansaithe gránna Nollag. Ach, má tá díomá ort, seo é an scannán duit.
Insítear in Office Christmas Party scéal grúpa fostaithe agus iad ag déanamh iarrachta an chóisir is fearr riamh a cruthú chun an comhlacht a shábháil. Tá greann don scoth agus taispeántais iontacha ó Jason Bateman, Jennifer Aniston agus Kate McKinnon – ardóidh an scannán seo do spiorad agus do mheanma.
Carol (2015), dir. Todd Haynes
Bunaithe ar an leabharThe Price of Salt le Patricia Highsmith, leantar in Carol beirt bhan agus a gcaidreamh lena chéile i Meiriceá sna 1950óidí. Scéal álainn, lán mothúchán atá ann, agus an buntáiste ann go dtiteann sé amach le linn na Nollag. Cruthaíonn sé seo nach é Happiest Season an chéad scannán leispiach Nollag.
Agus stiúrthóireacht iontach ann ó Todd Haynes, a cruthaíonn stíl na 50idí gan stró, agus taispeántais chroíbhriste ó Cate Blanchett agus Rooney Mary, seo an rogha cheart má tá fonn ort caoineadh. Tá sé ceart go leor. Bliain chrua a bhí ann. Lig amach é.
B’fhéidir nach mothaíonn na clasaicí mar an gcéanna, ach is féidir linn sult a baint as an séasúr i mbealaí difriúla. Cibé bealach atá tú chun an Nollaig a chaitheamh i mbliana, fan slán agus sásta, agus breathnaigh ar roinnt scannán maith.
