Trí mhí go leith i ndiaidh gur bhuail SpongeBob an Scannán an scáileán mór beidh an dara fadscannán Gaeilge le feiceáil i bpictiúrlanna na tíre.
Scannán beochana é Amhrán na Mara ó stábla Cartoon Saloon Chill Chainnigh agus fuair an leagan Béarla den saothar, Song of the Sea, ainmniúchán Oscar ní ba luaithe i mbliana.
Chuir an comhlacht léiriúcháin Macalla an leagan Gaeilge le chéile agus beidh deis ag an phobal mór breathnú ar a dhraíocht nuair a eiseofar é sna pictiúrlanna Dé hAoine 10 Iúil.
Mar a léirítear san fhíseán thuas, scéal gleoite geanúil é a bhfuil tionchar bhéaloideas na farraige in Éirinn le brath ann agus a leanann eachtraí an chailín óig Saoirse is a deartháir Ben, agus iad ar aistear rúndiamhair isteach i saol na selchidh (selkies), mná a thiontaíonn ina rónta.
Tá sár-aisteoirí ar nós Brendan Gleeson agus Fionnuala Flanagan le cloisteáil i measc ghuthanna na gcarachtar agus tá an barr-bhanna, Kíla, agus an t-amhránaí, Lisa Hannigan, ar an fhuaimrian.
Údarás Craolacháin na hÉireann agus TG4 a mhaoinigh an leagan Gaeilge agus dúirt Lis Ní Dhálaigh ón stáisiún go mbeidh Amhrán na Mara le feiceáil ar an chainéal féin amach anseo.
“Is scéal álainn é seo a bhfuil an dúchas agus an nuáil fite go healaíonta le chéile ann,” arsa Lis.
“Is breá ar fad linn go raibh ar ár gcumas leagan Gaeilge de a chur ar fáil don scáileán mór faoi láthair – agus don scáileán beag lá níos faide anonn.
“Táim cinnte go mbainfidh an lucht féachana taitneamh agus sult as.”
Eiseofar an leagan Gaeilge Amhrán na Mara agus an leagan Béarla Song of the Sea araon Dé hAoine 10 Iúil.
