D’ith mé Marmite den chéad uair riamh i mbliana. Níor thriail mé cheana é ach chuala mé an mhargaíocht go minic. Taitneoidh sé go mór leat nó beidh an ghráin agat air. Níl ach an dá rogha ann. Ach théis triail a bhaint as tá sé tugtha faoi deara agam go bhfuil rogha eile ann.
Tá Marmite ceart go leor.
Agus sílim go bhfuil an tuairim céanna ag daoine faoi Wes Anderson, ach sílim go bhfuil sé níos cruinne é a rá faoin stiúrthóir ná mar atá sé faoin leathán. Agus sílim go bhfuil sé níos cruinne fós faoina scannán is déanaí, Asteroid City.
Tá mise ar an gcriú atá den tuairim go bhfuil scannáin Wes Anderson ar chuid de na scannáin is fearr agus is neamhghnách i stair na scannán. Chomh maith le Christopher Nolan, tá sé ar cheann de na stiúrthóirí is aitheanta atá ag obair sa lá atá inniu ann. Tá a stíl chomh haitheanta sin, go bhfuil méim fhíorcháiliúil faoina chuid oibre ar TikTok faoi láthair, fiú ó dhaoine nach bhfuil aon scannán dá chuid feicthe acu, ach a aithníonn an stíl.
Níl aon scannán feicthe agam atá níos Wes Anderson-aí ná an scannán seo. Na tréithe a bhaineann le scannáin Wes Anderson, tá ardú go haer tagtha orthu anseo; na dathanna, an chineamatagrafaíocht, agus an dearadh. Tá téamaí aitheanta anseo a aithneoidh lucht leanúna Anderson go maith freisin. Faoi ghrúpa scoláirí óga agus a muintir ag féile eolaíochta i mbaile beag darbh ainm Asteroid City atá an scannán, agus an t-eachtra neamhréalaíoch a tharlaíonn ar an lá céanna. Insítear an scéal i bhfoirm dráma, leis na haisteoirí i bpáirt na gcarachtar sa scéal, agus i bpáirt na gcarachtar sa dráma, agus téamaí teaghlaigh agus grá fite fuaite tríd.
An bhfuil sé sin sách casta daoibh?
Agus ansin tá an liosta fada d’aisteoirí cáiliúla atá sa scannán; Tom Hanks, Jason Schwartzman, Scarlett Johansson, Tilda Swinton, Edward Norton, Bryan Cranston, agus níos mó arís nach féidir a lua, nó ní bheidh san alt ach ainmneacha. Nóta atá suimiúil faoin aisteoireacht ná nach seasann aon aisteoir amach – cé go bhfuil an oiread aisteoirí aitheanta sa scannán – mar gheall go bhfuil stíl ar leith le aisteoireacht i scannáin Wes Anderson. An t-aon duine i ndáiríre a sheasann amach ná Tom Hanks, agus is mar gheall gur cosúil go bhfuil sé ag streachailt le stíl Anderson ar bhealach a thagann go nádúrtha do aisteoirí a bhfuil seanaithne acu air ar nós Jason Schwartzman agus Edward Norton.
Anois, níl aon scannán Wes Anderson feicthe agam nár thaitin liom, agus cé go gceapaim go bhfuil Asteroid City go maith, déarfainn nach bhfuil sé ar leibhéal Isle of Dogs, The Royal Tenenbaums ná The Grand Budapest Hotel, cé go bhfuil sé níos cosúla leis an gceann deireanach sin ná aon cheann eile. Tá an scannán seo chomh báite sa stíl, gur geall le scigaithris é ar scannáin eile Wes Anderson. Agus do dhuine cosúil liomsa a bhfuil grá mór agam do scannáin Wes Anderson, bhí sé beagán iomarcach. Mar sin sílim do dhaoine eile a bhfuil claonadh an Marmite acu d’obair Anderson, beidh an ghráin dhearg acu ar an scannán seo. Ach dóibh siúd a bhfuil grá acu dó, beidh go leor anseo a thaitneoidh leo, tá sé barúil, lán le croí agus meidhir.
