Thaitin sé liom. Cineál.
Léirmheas ar 'Venom'

Tá mé ar ais. Níl léirmheas scríofa agam ar feadh cúpla seachtain agus tá cúpla fáth ann le haghaidh sin. Fáth amháin ná go bhfuil mé níos gnóthaí faoi láthair ná mar a bhí mé riamh i mo shaol go dtí seo, agus mar sin caithfidh mé scannáin a roghnú go cúramach, mar níl am agam péire nó trí cinn a fheiceáil sa tseachtain mar a rinne mé go dtí anois. 

Ag dul leis sin tá an fáth mór eile, is é sin go bhfuil clú beag orm anois mar chineál ‘Dubhghailleach Diúltach’ agus bhí mé ag iarradh scannán maith a fheiceáil leis an íomhá sin a athrú. Faraor tá chuile scannán atá feicthe agam le mí go hainnis, agus is féidir léirmheas a dhéanamh orthu in aon abairt amháin, mar shampla Mile 22 (Go dona, ná breathnaigh air) agus The Predator (Go dona, ná breathnaigh air). Ansin sheol eagarthóir na hirise seo téacs chugam ag iarraidh léirmheas ar scannán nua Tom Hardy, Venom. 

Faoin am a chonaic mise é bhí léirmheasanna ag teacht aníos ar Twitter ag rá nach raibh cuma ná caoi air, agus ón réamhamharc a fuair mé féin, agus an méid a bhí ar eolas agam faoin gcarachtar cheana, bhí an léirmheas leathscríofa agam sula ndeachaigh mé isteach. 

Ach tháinig an scannán seo aniar aduaidh orm de bheagán. Thaitin sé liom, cineál. Anois, ní hé sin le rá go bhfuil an scannán seo go maith, mar níl, ná baol air. Go deimhin déarfainn gurb é an scannán is measa le haon cheangal le Marvel nó Spiderman é. Níl aon chiall leis an scéal, tá an luas ina chéas uilig agus tá aisteoireacht Hardy chomh haisteach agus thar fóir i comparáid leis na haisteoirí eile, tá sé ar nós gur cheap chuile dhuine go raibh siad ag déanamh scannán difriúil. 

Ach bhain mé spraoi as an scannán mar gheall ar na gnéithe seo. Chuir sé na scannáin Blade Trinity agus The Punisher le Tom Jane i gcuimhne dom. Scannáin áiféiseacha faoi charachtair áiféiseacha agus scéal nach leanann aon chineál pátrúin ná foirmle. 

Tá foréigean ann ach ní féidir aon fhuil a fheiceáil, tá sé ar nós gur scríobh buachaill ceithre bliana déag d’aois an script, mar sin, tá an greann ar an leibhéal sin agus tá Eminem ar an bhfuaimrian. Déanadh an scannán seo do dhéagóirí, agus tá mé cinnte go mbainfidh déagóirí taitneamh as. Ní ag caitheamh anuas air atá mé nuair a deirim é sin ach an oiread, dá dtiocfadh an scannán seo amach agus mé sé déag, thabharfainn sé réalta as cúig dó, ach mar atá níl mé sé déag, agus tá mé ag tabhairt dhá réalta as cúig dó. Fan go dtiocfaidh sé amach ar Netflix, faigh slám beorach agus píotsa agus féach air le do chairde. Beidh an-chraic agaibh, ach ná híoc airgead as ag an bpictiúrlann.