Má d’airigh tú uait an pharáid anuraidh, seans go bhfuil dearmad déanta agat ar an bhfíoréispéaras ar Lá Fhéile Pádraig. B’fhéidir go ndeachaigh na fógraí ar an teilifís go mór i bhfeidhm ort nó go bhfaca tú an ghrian ag taitneamh inné agus gur chuir sé fonn uachtar reoite (nó beorach) ort, agus seasamh ar an tsráid ag breathnú ar na flótaí ag dul tharat. Ná lig don chumha seo an dallamullóg a chur ort, is mór an dose é Lá Fhéile Pádraig, agus is measa fós na dreamanna a chastar ort. Seo seachtar nár casadh ort ag an bparáid anuraidh, ach gur cinnte nach bhféadfá éalú uathu i mbliana
1. An Fear Ard
Cuma cá seasann tú sa slua, nó má bhí tú ann luath ar mhaithe le háit mhaith a fháil le seasamh, éireoidh leis an mboc seo seasamh idir thú agus an pharáid agus ní bheidh amharc agat ar thada. Caithfidh tú an chuid eile den pharáid ag síneadh do mhuiníl ag iarraidh radharc a fháil ar an mbóthar. Ní fiú duit é – tá bealach ag mo dhuine é féin a chorraí ag an am céanna sa gcaoi is nach bhfeicfidh tú tada.
2. Bean na nUillinneacha Géara
Má bhí an fear os do chomhair amach ar cur saighleam ort, fan go seasfaidh sí seo taobh thiar díot. Bí ar d’aire, tabharfaidh sí sonc maith sna heasnacha duit a bhainfidh an anáil díot –trí thimpiste mar ó Dhia – agus sula mbeidh deis agat d’anáil a tharraingt, beidh sí théis sleamhnú amach os do chomhair.
Más sólás ar bith duit é, beidh uirthise anois déileáil leis an bhfear ard.
3. An Fear a bhfuil Páiste ar an Ghualainn Aige
Fan amach ón bhfear seo. Cé gur deise é le déileáil leis ná an fear ard, beidh an oiread útamála air ag iarraidh an páiste a choinneáil sásta agus socair gur dóigh go bhfaighidh tú cic sa straois. Má sheasann sé in aice leat, beannaigh dó agus bog ar aghaidh.
4. An Bhean Ghlas
Bheadh feiceáil ar an mbean seo ón ngealach leis an méid sparkles agus sequins atá uirthi. Chuaigh sí thar fóir uilig agus í ag fáil réidh do Lá Fhéilé Pádraig, agus tá spéaclaí gréine glasa uirthi, fáinní cluaise, bandaí gruaige, bróga glasa á chaitheamh aici agus seamróg péinteáilte ar a leiceann. Ach beidh sí réidh don bháisteach, ní fearacht an dream eile thimpeall uirthi – cheannaigh cóta báistí glas as Penneys, ar gearr le mála mór bosca bruscair é.
5. An Turasóir
Ní bhíonn duine acu seo ariamh ina aonar agus bíonn a threabh i gcónaí ina chuideachta. Bíonn sé éasca an turasóir a aithint, cé go mbíonn an getup céanna air agus a bhíonn ar an mBean Ghlas. T-léine ar a bhfuil “póg mo thóin” nó “kiss me I’m Irish” ar íoc sé lán laidhre uirthi a bheidh á caitheamh aige in ionad an chóta báistí, agus cuma air go bhfuil sé i bhfad róshásta leis féin.
(Is é sin, dár ndóigh go dtosaíonn sé ag doirteadh báistí agus go mbáitear go craiceann é).
6. Bean an Bhugaí
Is measa í seo na Fear an Pháiste mar go mbíonn an bugaí á bhrú os a comhair aici, beag beann ar cibé rúitín nó ladhracha atá ina bealach. Scarannn sí na sluaite mar a dhéanfadh Maois. Seans nach páiste ar bith atá sa mbugaí aici ach fleaisc thermos agus slám ceapairí.
7. Naomh Pádraig
An fear mór é féin. Cá mbeadh muid dá uireasa?
Siúlann sé as féin sa bparáid, crochann sé lámh ar an slua agus b’fhéidir go mbeadh corrmhilseán aige le tabhairt uaidh aige. Ní bheidh sight ar na nathracha nimhe. Is breá leis an slua é a fheiceáil, ach níl foighid ar bith ar charranna taobh thiar de dó. Ní chloistear tada ach bípeanna ó na tiománaithe flót ag iarraidh deifir a chur leis. Feicfidh tú sa bpub théis an pharáid é agus é ag caitheamh siar piontaí.
