I gCuimhne Mháirtín Uí Chadhain: Polaitíocht, Litríocht agus Teanga, plé painéil, Dé Céadaoin 4 Samhain @ 19:00
Beidh cruinniú ar líne ar siúl i gcuimhne ar Mháirtín Ó Cadhain, a cailleadh leathchéad bliain ó shin, an tseachtain seo chugainn. Is plé painéil a bheidh i gceist as Gaeilge, le haistriúchán comhuaineach ar fáil más mian le daoine leas a bhaint as a leithéid.
I measc na gcainteoirí beidh Aoileann Nic Gearailt (údar Sairséal agus Dill: 1947-1981 Scéal Foilsitheora) agus Ruairí Ó hUigínn (Cathaoirleach Iontaobhas Uí Chadhain). Breis eolais ar fáil ach cuairt a thabhairt ar an leathanach seo.
Seoladh albam na beirte Eoghan Ó Ceannabháin agus Ultan O’Brien, Facebook Live, Déardaoin 5 Samhain @ 20:30
Chuala blaiseadh d’albam nua na beirte Eoghan Ó Ceannabháin agus Ultan O’Brien i rith na seachtaine, agus singil úr eisithe acu i dteannta a chéile. Cúirt Bhaile Nua an teideal atá air, amhrán a chualadar ó Threasa Ní Mhiolláin. Más ea, tá a rian féin curtha acu ar an leagan seo. Beidh sé seo le fáil ar Solas an Lae, albam a sheolfar Déardaoin beag seo, ag baint úsáide as Facebook Live. Bí leo óna 20:30 chun a thuilleadh ón albam a chlos!
‘I wish I could speak Irish… but….’ Plé Painéil, Dé hAoine 6 Samhain @ 13:00
‘I wish I could speak Irish… but…’, ar dúradh a leithéid riamh leat? Pléifear seo agus moltaí a d’fhéadfaí a thabhairt mar fhreagra ar an ráiteas ag plé painéil a bheidh ar siúl seachtain ó inniu.
Aontas na Mac Léinn in Éirinn atá á eagrú agus is faoi chathaoirleacht Osgur Uí Chiardha a bheidh an chaint. Páirteach beidh an file dátheangach Ciara Ní É, Ciarán Wadd ó Chonradh na Gaeilge agus Rút Ní Theimhneáin, múinteoir Gaeilge atá lonnaithe i gCeanada. Gach eolas maidir le clárú agus a raile le fáil ar shuíomh an Aontais.
Ceardlann scríbhneoireachta le Cló Iar-Chonnacht, 7 Samhain, ar-líne
Tá ceardlann scríbhneoireachta á heagrú ag Cló Iar-Chonnacht don Satharn 7 Samhain. Is dírithe ar ghearrscéalta, úrscéalta agus splancscéalta a bheidh an tseisiún seo, faoi stiúir Mhichíl Uí Chonghaile agus Mhíchíl Uí Ruairc, (beirt a bhfuil fios a gcúram go maith acu!)
Is ar scríbhneoirí óga/nua is mó atá sé seo dírithe, agus orthu siúd nach bhfuil aon leabhar dá gcuid foilsithe. Mar sin féin, fáilteofar roimh dhornán scríbhneoirí aitheanta chomh maith, más mian leo tabhairt faoi. Má tá suim agat ann, seol sliocht as úrscéal de do chuid (5-8 leathanach) nó cúpla splancscéal chuig stiúrthóir CIC, Mícheál Ó Conghaile ag moccic22@outlook.com
Beidh ceardlann eile á reáchtáil acu ag tús na míosa seo chugainn… ach beidh a thuilleadh eolais agam daoibh faoi sin i gceann cúpla seachtain!
Seimineár an Oireachtais: Na Coláistí Samhraidh sa Ghaeltacht, ar líne 15.00 31 Deireadh Fómhair, á óstáil ag Conradh na Gaeilge agus Oireachtas na Gaeilge
Is ar chás na gcoláiste samhraidh sa Ghaeltacht a bheidh cainteoirí Sheimineár an Chonartha ag díriú a n-airde i mbliana. Ar ndóigh, bhíomar ceaptha a bheith le chéile ag Oireachtas na Samhna i gCathair na dTreabh an tseachtain seo, ach buíochas le foireann an Oireachtais agus dreamanna eile beidh imeachtaí fíorúla ar siúl ar feadh an deireadh seachtaine.
Is í Máirín Ní Ghadhra, láithreoir An tSeachtain ar RTÉ Raidió na Gaeltachta agus Seacht Lá ar TG4, a bheidh ina cathaoirleach ar an bpainéal agus is iad an tAire Stáit don Ghaeltacht Jack Chambers, Uachtarán an Chonartha Niall Comer, agus Máire Denvir ó Choláiste Chamuis a bheidh i mbun cainte ann. Bí leo ar líne anseo.
