Tá leath na dticéad campála díolta d’Fhéile na Gealaí cheana féin agus gan ach trí lá fágtha le leas a bhaint as an “lascaine do mhochóirí”. Tá €50 ar thicéad campála go dtí Lá Fhéile Pádraig agus ardófar an praghas ar an 18 Márta.
Thug urlabhraí Fhéile na Gealaí le fios do NÓS tráthnóna go mbeidh an banna rac-cheoil ‘Smugairle Róin’ as Ráth Chairn, agus a bhfuil gradaim buaite acu dá gcuid ceoil, ag casadh ag an bhféile i mbliana. Fógraíodh an tseachtain seo caite go mbeidh ‘Las’ ar an ardán i Ráth Chairn mí an Mheithimh freisin chomh maith leis na ceoltóirí agus bannaí eile ceoil a fógraíodh níos túisce i mbliana.
Beidh an grúpa filíochta REIC ag an bhféile arís i mbliana agus beidh trí stáisiún raidió, Raidió na Life ó Bhaile Átha Cliath, Raidió Fáilte ó Bhéal Feirste, agus Raidió na Gaeltachta ag craoladh beo ón láthair. Beidh Pod don Eolach, podchraoladh NÓS á thaifeadadh beo ag Féile na Gealaí freisin.
“D’fhógair muid ceoltóirí agus imeachtaí difriúla le cúpla seachtain anuas, agus muid ag dúil le níos rudaí a fhógairt amach anseo. Tá forbairtí móra á ndéanamh ar láthair na féile, agus beidh stáitse mór ann agus pubaill, beidh cuma níos fearr ar an áit ná mar a bhí anuraidh agus arú anuraidh.
“Beidh dhá sheastán bia ann, Blasta ó Mhuineachán agus beidh Joe’s ann arís, comhlacht a bhí linn anuraidh a dhéanann na burgair is fearr ar domhan, agus ar ndóigh beidh caifé Ráth Chairn ann fosta. Beidh ‘Boogie Bus’ againn, bus mór a bhíonn ag díol deochanna teo agus ag casadh ceoil, ar feadh an deiridh seachtaine,” a dúirt Hannah Rua Ní Bhaoill, duine d’eagraithe na Féile.
Beidh bannaí ceoil ag teacht ó Albain agus iarrachtaí ar bun ag Féile na Gealaí caidreamh idir-Ghaelach a shocrú agus muintir na hAlban a mhealladh go Gaeltacht na Mí. Beidh lascaine ar fáil i ndiaidh Lá Fhéile Pádraig d’Albanaigh atá ag iarraidh teacht go Féile na Gealaí.
Ar na ceoltóirí eile a bheidh i Ráth Chairn idir 15-17 Meitheamh, beidh Niteworks, Polca 4, Scannal, KNEECAP, JJ Ó Dochartaigh, Emma Ní Fhíoruisce, Abhainn Bheara, Dó Fá Dó, agus an Chrann Óg. Tá níos mó ceoltóirí le fógairt sna seachtainí amach romhainn.
Tá busanna eagraithe ó Bhaile Átha Cliath agus ó Bhéal Feirste le freastal ar an bhféile agus beidh tuilleadh sonraí fúthu sin ar fáil go luath. Tá costas €50 ar thicéad campála go dtí Lá Fhéile Pádraig, beidh costas €65 ar thicéad go dtí Lá Bealtaine agus beidh costas €80 ar thicéad ina dhiaidh sin. Beidh ticéid lae ar díol freisin.
