50 Uair, 50 Dúshlán Gaeilge!
Á shruthú ar líne faoi #dúshlán

Tá #Dushlán 2016 faoi lán seoil, an comórtas náisiúnta atá ag déanamh gníomhaithe teanga de mhic léinn ollscoile agus daltaí meánscoile na tíre, ó bhí an lá inné ann.

Seo an dara bliain don chomórtas a bheith á reáchtáil ina gcaithfidh daoine óga 50 gníomh a dhéanamh ar son na Gaeilge taobh istigh de 50 uair an chloig, agus tá muid ag baint an-sult in oifigí NÓS as iarrachtaí na bhfoirne uile atá ag sruthú ar líne faoin haischlib #Dúshlán:

D’eascair #Dúshlán ón imeacht ‘An Cuardach Craiceáilte’, a reáchtáladh ag Oireachtas na Samhna cúpla bliain ó shin agus a thug ar mhic léinn dul i mbun feasachta, ar bhealach spleodrach spraíúil a rachadh chun tairbhe don teanga.

Dúirt Edel Ní Bhraonáin – Comhordaitheoir na Mac Léinn / Conradh na Gaeilge / Glór na nGael / Aontas na Mac Léinn in Éirinn (AMLÉ) – atá ag reáchtáil an chomórtais, gur ábhar dóchais é an fás mór atá tagtha ar líon na ndaoine óga atá ag glacadh páirte i mbliana.

“53 foireann a chláraigh anuraidh agus i mbliana tá 132 foireann páirteach ann, déanta de bheirt nó triúr,” arsa Edel.

“Tá os cionn 240 duine cláraithe i mbliana agus iad ag tabhairt faoi réimse leathan gníomhaíochtaí feachtasaíochta ar son na Gaeilge.

“Deis atá ann úsáid a bhaint as seirbhísí i nGaeilge agus seirbhísí a éileamh i mbealach spraíúil.”

Le linn an chomórtais, tugann iomaitheoirí faoi mheascán breá dúshlán a ghnóthaíonn pointí dóibh, thar thréimhse 50 uair an chloig.

Tá duaiseanna ar nós iPad Mini, dearbháin dheasa agus coirn le buachaint acu.

I measc na ndúshlán is simplí, is féidir teagmháil a dhéanamh le stáisiúin raidió Ghaeilge, paicéad Taytos Gaeilge a cheannach (na cinn ghlasa ar a bhfuil pacáistiú Gaeilge nua orthu), amhrán a cheol i nGaeilge, dán a rá nach bhfuil ar an chúrsa ardteiste, moladh a thabhairt do ghnó a bhfuil an Ghaeilge in úsáid acu agus ailt de chuid Tuairisc.ie agus NÓS a roinnt.

Thaitin an ceann sin linn go mór! 😉

Is léir gur bhain foireann ‘An Bricfeasta Blasta’ sult as an spraoi ar maidin chomh maith.


“Seans go gceapfadh daoine nach fiú an méid sin a dhéanamh ach tá muid ag iarraidh éileamh a thaispeáint go bhfuil muid ann agus gur mhaith linn na seirbhísí seo a úsáid,” arsa Edel.

Tá rudaí níos dúshlánaí chomh maith a thugann ar na rannpháirtithe teagmháil a dhéanamh le polaiteoir nó feisire áitiúil, nó plé le státseirbhísigh i nGaeilge.

Tá go dtí 4in amárach na gníomhartha ar fad a chur i gcrích.

Bígí gníomhach! Bígí Gaelach!