Thuirling an Solar Impulse 2, eitleán a ritheann ar fhuinneamh gréine amháin, go talamh in Abu Dhabi ar maidin agus turas 40,000km timpeall an domhain curtha isteach go slán aige.
Seo an chéad uair a bhfuil turas thart ar an chruinne déanta in eitleán a bhí ag reáchtáil ar fhuinneamh ón ghrian amháin.
Cuireadh tús le turas stairiúil an Solar Impulse 2 ar an 15 Márta 2015 in Abu Dhabi faoi stiúir Andre Borschberg agus Bertrand Piccard ón tSualainn.
Ar landáil dóibh sna huaireanta beaga maidin inniu, seoladh giolc ó chuntas Twitter @solarimpulse agus pictiúr den bheirt eitleoirí áthasacha.
BREAKING: we flew 40'000km without fuel. It's a first for energy, take it further! #futureisclean pic.twitter.com/JCvKTDBVZx
— SOLAR IMPULSE (@solarimpulse) 26 Iúil 2016
Turas corraitheach, fada, dúshlánach go maith a bhí ann ina raibh na heitleoirí gafa i spás fíorbheag ar feadh tréimhsí fada.
Ó thaobh meáchain de, is ionann an Solar Impulse agus cairrín beag.
Is furasta a shamhlú a dheacra a bhí an turas agus iad ag eitilt 30,000 troigh in airde go mall thar uiscí garbha agus talamh iargúlta.
Idir 30-60km san uair meánluas an eitleáin ghrianfhuinnimh.
Tógadh fuinneamh isteach trí 17,000 ceallra gréine agus rinneadh an fuinneamh a stóráil sna ceallraí úd ionas go mbeadh an t-eitleán in ann tarraingt ar an fhuinneamh san oíche.
Ar philleadh dó, dúirt Bertrand, atá ag ullmhú don turas seo ó bhí 1999 ann, gur spreagadh mór is ea an togra seo i ndomhan na teicneolaíochta glaise.
D’aithin sé gurb í oidhreacht an Solar Impulse an pobal idirnáisiúnta a chothaigh sé.
Fuinneamh glas go deo!
