Chaith mé uaim an buidéal aerasóil…
An Gael Glas

Agus mé amuigh le cairde, is minic a fheicim buidéil ghloine agus miotail ina málaí, cupáin choinneála sa charr agus málaí in-athusáide ar an ngualainn acu agus iad amuigh ag siopadóireacht. 

Ach nuair a théim ar cuairt chun an tí ag na Gaeil ghalánta ghlasa seo feicim roinnt mhaith rudaí timpeall an tí féin nach gcuireann lena n-iarrachtaí dul i ngleic leis an éigeandáil aeráide. Ar cheann de na rudaí seo tá na haerasóil a bhíonn sa seomra folctha nó sa seomra codlata ag go leor againn — Sure, Nivea, Rightguard agus an diabhal Lynx sin a thachtadh ar scoil muid. 

Chaith mé uaim an buidéal aerasóil an samhradh seo caite agus le breis agus bliain anuas tá mé ag baint trialach as táirgí éagsúla ar na hascaillí. Ar cheann de na táirgí sin tá an barra T’eo ón gcomhlacht cosmaidí agus cumhrán Lush. 

Thart ar €8 a chosnóidh barra 90g ort — ach cá bhfios nach dtiocfadh athrú suntasach ar an bpraghas sin i ndiaidh an Bhreatimeachta. Cheannaigh mise an barra atá in úsáid agam faoi láthair ar an 16 Iúil agus tá a leath fós agam i ndiaidh dom é a úsáid gach lá ó shin. Bheinn ag súil go mairfeadh an barra 90g go mí Dheireadh Fómhair ar a laghad, mar sin, ach coinneoidh mé ar an eolas sibh!

Is maith liom an boladh citris atá ar an T’eo, boladh nach maireann chomh láidir sin ar feadh an lae, ach a bhíonn an-suntasach an chéad rud ar maidin. An rud is tábhachtaí ná nach mbíonn boladh nádúrtha na n-ascaillí le bolachtáil ag deireadh an lae, agus ní theipeann ar an T’eo an chosaint sin a thabhairt. 

Tá sé cineál aisteach dul i dtaithí ar bharra crua púdair a sciúradh faoi na lámha in áit an roll-on nó, níos measa fós, an spray-on, ach tar éis cúpla seachtain bíonn sé chomh nádúrtha le rud ar bith. 

Tá cúpla moladh agam don té a cheannóidh T’eo Lush:

Bí cinnte an barra a choinneáil i do sheomra codlata nó i seomra éigin eile a bhíonn tirim. Má bíonn sé ar an tseilf sa seomra folctha agus é taobh amuigh de bhosca leáfaidh sé agus ní bheidh aon mhaith ann duitse. Ní leor na boscaí adhmaid agus miotail a dhíoltar in Lush lena shábháil ón taise. 

Má bhíonn tú ag taisteal, nó fiú á úsáid sa spórtlann, bí cinnte go gceannaíonn tú bosca miotail lena chosaint. Is púdar atá ann ag deireadh an lae agus beidh do mhála taistil nó mála spóirt scriosta ag púdar bán citris gan bhosca. 

As ucht Dé triomaigh na hascaillí sula gcuirfidh tú ort é! Is décharbónáit sóidiam atá ann agus má bhíon oiread is braoinín beag amháin uisce ar do chraiceann imoibreoidh sé leis an NaHCO3 agus dófar do chraiceann. Bí cinnte go dtriomaíonn tú uisce ón linn snámha, ón bhfarraige, ón gcith agus fiú do chuid allais féin den ascaill ar dtús.

Ní mór dom a lua libh go bhfuil fionnadh ar mo chuidse ascaillí ach go bhfuil tuairiscí cloiste agam ó dhaoine a bhearrann na hascaillí go mbíonn an barra cineál tinn ar ascaill nuabhearrtha.