Is iomaí scéal fánach agus teoiric comhcheilge faoin phláinéad Mars, an chuid is mó acu gan aon bhunús ó thaobh faisnéise ná eolaíochta de.
Mar sin féin, anois is arís tagann píosa fianaise chun solais a thugann orainn breathnú ar na fíricí uair amháin eile agus, b’fhéidir, ár dtuiscint ar an chruinne a cheistiú.
Ceann acu sin ná an íomhá PIA 17931 a ghlac róbat taiscéalaíochta NASA, an Curiosity Rover, agus a foilsíodh ar shuíomh idirlín NASA i mí Eanáir 2014.
Glacadh an grianghraf ar dhumhach creagach darb ainm Dingo Gap agus léiríonn sé an tírdhreach a shamhlaítear le Mars go hiondúil.
Ar thaobh na láimhe clé den ghrianghraf, áfach, dealraíonn sé go bhfuil trí litir scríofa ar chloch.
Tá an chuma air gur seanleagan den litir ‘Y’ atá ann, le dhá chruth eile ar an dá thaobh.
Seans ar ndóigh gur cruth orgánach é seo agus go bhfuil ár súile ag cur mearbhaill orainn ach is cinnte gur díol spéise é agus tá sé ráite ag roinnt geolaithe nach féidir le línte mar sin bheith ann go nádúrtha sa dúlra mar is eol dúinn é.
Dealbh?
Ní hé seo an t-aon rud amháin sa ghrianghraf céanna a chuirfidh i mbun machnaimh tú áfach.
Ar an taobh eile den íomhá tá cloch eile ann a bhfuil cosúlacht deilbhe ag gobadh amach as an talamh uirthi.
Go deimhin, déarfadh go leor go bhfuil aghaidh le feiceáil – súil amháin, srón agus béal – greannta sa chloch agus gur soiléire é ná na litreacha fiú.
Ba chóir a chuimhniú gur íomhá oifigiúil de chuid NASA é seo atá le feiceáil agus le híoslódáil óna chartlann grianghrafanna.
Cad ar a bhfuil muid ag breathnú anseo mar sin?
Iarsmaí ó shibhialtacht ársa a bhí beo ar Mhars tráth, nó bobanna físe?
