Toghadh an líon is mó bundúchasach Meiriceánach riamh chun Comhdháil na Stát Aontaithe sa toghchán a reáchtáladh sa tír sin inné. Sheas 13 duine in ocht stát sa toghchán a bhí ar siúl ag an am céanna le toghchán na huachtaránachta inné.
Tá 11 suíochán ar fáil don 13 duine sin agus tá dhá thoghcheantar ann a bhfuil níos mó ná bundúchasach amháin ag seasamh ann. Go dtí seo, tá cúigear iarrthóirí tar éis suíochán a bhuachan, rud a fhágann go mbeidh níos mó bundúchasach sa gcéad Chomhdháil eile ná mar a bhí riamh cheana i stair na Stát.
Atoghadh an ceathrar a bhí sa Chomhdháil dheireanach an chéad bheirt bhan bhundúchasacha a bhuaigh suíochán sa Chomhdháil ina measc — Deb Haaland agus Sharice Davids. Is iad Tom Cole agus Markywayne Mullin an bheirt eile a choinnigh a n-áit in Washington.
Duine de mhuintir Sheiricíoch, Yvette Herrell, a bhuaigh an cúigiú suíochán. Sheas Yvette in New Mexico, áit ar sciob sí an suíochán ó Xochitl Torres Small.
Is dócha ná a mhalairt go mbeidh a séú duine ann — an Haváíoch dúchais Kaiali’i “Ka” Kahele, a sheas do na Daonlathaigh in Haváí. Má bhíonn an lá ag Kai, beidh sé ar an dara Haváíoch dúchais a toghadh chun na Comhdhála ó tugadh Haváí isteach sna Stáit Aontaithe in 1959.
Níor éirigh leis an Daonlathach Paulette Jordan ina hiarracht suíochán i Seanad SAM a bhuachan ná le Mark Charles a sheas don uachtaránacht féin.
Dúirt Deb Haaland go raibh áthas uirthi gur sheas an oiread sin bundúchasach do thoghchán na Comhdhála i mbliana.
“Caithfidh muidne a bheith san áit a ndéantar na cinntí. Caithfidh glór a bheith againn ag an mbord, is cuma cén bord atá i gceist, agus muid ag déanamh cinntí dár muintir, do mhuintir ár dtoghcheantar, agus do mhuintir na tíre. Tá sé ríthábhachtach,” a dúirt sí.
Toghadh Deb den chéad uair in New Mexico in 2018 agus ba í féin agus Sharice Davids as Kansas na chéad bheirt bhan bhundúchasach a toghadh chun na Comhdhála. Tá sí ina comhchathaoirleach ar Chácas na mBundúchasach, ina leaschathaoirleach ar choiste na n-acmhainní nádúrtha, ina cathaoirleach ar fhochoiste na bpáirceanna náisiúnta, agus ina ball d’fhochoiste na mbundúchasach.
