Níl mé rómhaith ag an matamaitic. Is mé atá buíoch go bhfuil áireamhán ar an bhfón agam. Ach fiú agus an deis sin agam, nílim in ann a dhéanamh amach ar bhealach ar bith faoin spéir cén chaoi go bhféadfadh sé gur tugadh cuireadh dinnéir do 81 duine, gur ith siad ar fad an béile céanna, gur éist siad leis na hóráidí céanna in óstán an Station House ar an gClochán, ach in ainneoin sin, nach raibh siad ag an ócáid chéanna.
Níl an mata ag obair domsa. Bíodh sin mar atá, is cosúil gur fhoghlaim lucht dlí a gcuid mata go maith agus cinneadh nach raibh aon dlí sáraithe ag an dinnéar a bhí ag Coiste Gailf an Oireachtais le linn shrianta COVID-19. Sin an dlí, agus ní féidir é a shárú (mura bhfuil pócaí téagartha agat agus fonn ort achomharc a dhéanamh).
Tá dhá chúirt ag suí sa scéal seo, áfach. An chúirt dlí, a chinn nach raibh aon damáiste déanta seachas do na daoine a chaill postanna, agus cúirt an phobail, a chaill a cipín nuair a fuair siad amach a fhad agus a bhí siadsan curtha faoi chosc, go raibh deis ag na daoine mór le rá na srianta a sheachaint. Thuig go leor de na ‘daoine móra’ é seo. Roghnaigh an tiar-Thaoiseach Enda Kenny gan freastal air ar chor ar bith. Chinn an tAire Dara Calleary éirí as a aireacht a luaithe agus a thuig sé go raibh an pobal gortaithe.
D’eisigh an craoltóir Sean O’Rourke a leithscéal ag rá nach raibh aon leithscéal aige agus go raibh aiféala air. Cuireadh iallach ar dhaoine eile a dhul chun cúirte. Thuig an chuid ba mhó acu a mbotún. Thuig Calleary gur chuir sé muinín an phobail sna srianta slándála i mbaol, go háirithe nuair a bhí sé i measc na bpolaiteoirí a rinne cinneadh an lá roimh ré imeachtaí faoi dhíon a chiorrú ó leath-chéad duine go seisear. Ghoill sé ar dhaoine a bhí ag cur bainiseacha agus cóisir ar ceal, ar dhaoine a bhí coinnithe amach ó ghaolta a bhí go dona tinn in ospidéil nó an fhad agus a bhí leanaí ag teacht ar an saol. Ní raibh aon dul as. Bhí air éirí as.
Bhí níos mó muinéil ag an tiar-Choimisinéir Eorpach Phil Hogan. Sháraigh sé treoirlínte coraintín, rugadh air ag tiomáint agus fón ina láimh, agus thriail sé an dallamullóg a chuir orainn arís agus arís eile.
Meas tú an dtabharfaí cead do lánúin níos mó daoine a thabhairt ag bainis dá gcuirfí suas deighilteoir de chineál eicínt sa seomra? Ní dóigh liom é. An ceacht is mó atá foghlamtha agamsa ná aithne mhaith a chuir ar dhlíodóirí. Thaispeáin an triail seo domsa go bhfuil dlí amháin ann do na daoine atá in acmhainn í a sharú, agus dlí eile don chuid eile againn.
Ní maith le cúirt an phobail é sin.
