‘Ní chuirfidh lá saoire bainc aon snas ar lá oibre na n-oibrithe sláinte’

Is iomaí uair ráite agam é le dhá bhliain nach gcuirfidh tada ar bith beo iontas orm níos mó. Tá sé déanta arís acu. Tuilleadh iontais curtha ag an rialtas orm. Tá achrann tarraingthe acu anois faoi cén cineál íocaíochta nó buíochais a thabharfaidh siad do na daoine a sheas ar an líne thosaigh in aghaidh COVID-19. Mar a déarfadh an Gaeilgeoir Mór, “Go tobann” bhí chuile dhuine ina n-oibrithe ar an líne seo, oibrithe in oifigí na gcoimisinéirí ioncaim a chinntigh go raibh íocaíocht dífhostaíochta phaindéime próiseáilte in am ina measc. 

Tar éis ceithre uaire fichead, d’athraigh an port go lá saoire bainc breise. Níl tada ar bith faoin spéir is fearr le dochtúirí agus altraí agus daoine eile a oibríonn sa tseirbhís sláinte ná lá saoire bainc. Lá ina mbíonn aonaid éigeandála lán ag daoine tinn ag ól, drugaí, nó tite ó aill eicínt. Cén uair a bhuailfidh réasún muid? Is mór an náire na heagraíochtaí a rith amach ag caoineadh go raibh siad chomh tábhachtach leis na haltraí a d’oibrigh sna haonaid dianchúraim. Newsflash, Karen! Bhí gach duine beo againn ar an diabhal de líne thosaigh. Rinne an mhórchuid againn an méid a iarradh orainn. D’fhan muid sa mbaile. Nó chuaigh muid amach ag obair. Má bhí sé de mhí-ádh ort leaindeáil san ospidéal, bhí an líontán sábhála deireanach bainte amach agat agus ní raibh idir tú agus an bhearna bhaoil ach saineolaithe leighis a bhí gan eolas faoin víreas nua marfach seo. 

Tá cuid de na hoibrithe seo nár thóg oiread agus trí lá saoire as a chéile ó Mhárta 2020. Seo iad na daoine céanna a bhí ag ‘iompar’ laethanta saoire nach raibh siad in ann a thógáil ón bhliain seo caite, isteach sa mbliain nua, ceal foirne a scaoilfeadh saor iad. Bhuail COVID 25% de na hoibrithe seo. Fiú tar éis na praisí a rinneadh don Nollaig, nuair a osclaíodh an tír mar ceapadh go bhfanfadh an víreas amach agus muid ag ithe an turcaí, choinnigh na daoine seo orthu ag obair. Tá siad fós ag obair, ach anois, is ag tabhairt aire do dhaoine a roghnaigh gan an vacsaín a fháil atá siad.

Agus iad ag iarraidh poll de chineál a dhéanamh sna liostaí feithimh. Tá os cionn milliún duine ar liosta ag fanacht le haghaidh rud eicínt. Milliún. Ní chuirfidh aon lá saoire bainc nó cúpla céad euro aon snas ar laethanta oibre na n-oibrithe sláinte, ná ar liostaí feithimh. Níl aon leigheas ar ár gcóras briste leighis ach tuilleadh daoine a earcú. Tá pá á cheilt ar dhochtúirí agus altraí, agus tá seirbhís á ceilt ar an bpobal nuair nach bhfuil siad á n-earcú. 

Tá daoine ag fáil bháis ar liostaí. Más tada é, is masla eile é an méid atá caite amach faoin aer go héasca ag polaiteoirí. Ar ndóigh, ar an lá saoire bainc seo seans go mbeidh siad féin chomh gnóthach leis na hospidéil, iad ag déanamh bualadh bos ar na meáin shóisialta, iad féin feicthe ag chuile dhuine seachas na cúramóirí leighis a bheidh ró-ghnóthach le aird ar bith a thabhairt orthu.