Chláraigh breis agus 6,700 duine don chúrsa nua Gàidhlig a seoladh ar an aip foghlama teanga inné. Bhí ríméad ar mhuintir na hAlban agus ar dhaoine de shliocht na hAlban ar fud an domhain inné nuair a tháinig sé chun solais ar na meáin shóisialta go raibh an cúrsa Gàidhlig — nach rabhthas ag súil leis go dtí an bhliain seo chugainn — ar fáil.
Bhí fanacht fhada orthu siúd a bhí ag iarraidh cúrsa Gàidhlig ar Duolingo, an aip foghlama teanga is mó ar domhan, agus bhí feachtas mór ar siúl le blianta anuas an cúrsa a chur ar fáil. Cé gur luaigh grúpaí agus daoine aonair blianta ó shin é, glactar leis go forleathan gurbh iad lucht an chuntais Gàidhlig @TheDailyGael a chur an brú mór ar Duolingo an cúrsa a chruthú.
“Is é Duolingo an aip teanga is mó ar domhan. Is acmhainn ar leith atá ann a thabharfaidh an chéad bhlaiseadh den teanga do dhaoine a bhfuil suim acu inti, agus dóibhsean atá ag iarraidh a scileanna teanga a thabhairt chun cinn. Cé gur dócha nach dtabharfaidh Duolingo féin líofacht teanga do dhuine, is dea-thosú a bheadh ann dóibhsean atá ag iarraidh an teanga a fhoghlaim.
“Tá a fhios againn go bhfuil suim mhór ag go leor daoine in Albain agus ar fud an domhain an Ghàidhlig a fhoghlaim, go háirithe de bharr cláracha ina gcluintear an Ghàidhlig, ar nós Outlander. Tá muid ag iarraidh é sin a dhéanamh níos éasca do dhaoine agus níos mó daoine a tharraingt isteach i saol na Gàidhlig,” a dúirt duine de lucht an fheachtais le NÓS in earrach na bliana seo.
Fógraíodh i lár an tsamhraidh go raibh an cúrsa á réiteach agus go rabhthas ag súil go mbeadh sé ar fáil do ghnáthúsáideoirí Duolingo faoin samhradh seo chugainn, ach thángthas aniar aduaidh ar lucht úsáide na haipe inné nuair a cuireadh an cúrsa ar fáil tráthnóna aréir.
Tá an-tóir go deo i measc lucht labhartha na Gaeilge ar an gcúrsa nua freisin, mar is léir ó Twitter na nGael!
