Tráthnóna Dé Domhnaigh in Almería ar chósta na hAndalúise.
Tá na Bascaigh Eibar tar éis cailliúint 2-0 i gcoinne na foirne baile i gcluiche tábhachtach ag bun phríomhroinn sacair na Spáinne.
Fágann an toradh go bhfuil an dá chlub anois ar chomhphointí agus iad díreach taobh amuigh den zón dícháilithe.
Ní géarchéim na bhfoirne áfach atá mar ábhar díospóireachta ag an phreasócáid i ndiaidh an chluiche, ach cúrsaí teanga.
Is gnáth-chur chuige é ag cluichí de chuid na gclubanna Bascacha i La Liga (Athletic Bilbao, Real Sociedad, Eibar) go mbíonn preasócáid dhátheangach ann ag deireadh na himeartha, le hiriseoirí ó na meáin Bhascaise ag cur ceisteanna in Euskara, ansin babhta níos faide ceisteanna i Spáinnis.
Is mar sin a bhí sé leagtha amach ag an deireadh seachtaine do bhainisteoir Eibar, Gaizka Garitano, cainteoir dúchais Bascaise a stiúir an club chuig an phríomhroinn den chéad uair riamh anuraidh.
Ar fhreagairt na chéad ceiste dó ón stáisiún teilifíse Bascach ETB áfach, bhris iriseoirí spóirt de bhunadh Almería isteach ar a chuid cainte.
Stadadh an plé ar feadh nóiméid ach rinneadh amhlaidh arís díreach ina dhiaidh.
“An bhfuil fadhb ann?” a d’fhiafraigh an Bascach de lucht na casaoide.
“An bhfuil fadhb ann nó rud éigin?”
“Tá fadhb ann,” an freagra a fuair sé.
“Ní thuigeann muid focal atá á rá agat.”
Cháin preasoifigeach Almería, Juanjo Moreno, na hiriseoirí, d’iarr orthu meas a thaispeáint agus chuir sé ar a súile dóibh go mbíonn cur chuige dátheangach Catalóinis – Spáinnis in úsáid nuair a thagann Barcelona ar cuairt, ach níor athraigh sé sin a n-iompar drochbhéasach.
Sa deireadh bhí ar Garitano deireadh a chur leis an phreasócáid.
Agus é ag imeacht in éineacht le Garitano, thug Moreno “amadáin” ar na tuairisceoirí gearánacha.
Ba theasaí an plé a spreag an eachtra sna meáin leis an nuachtán móréilimh den eite dheis, ABC, ag cur i leith Garitano gur “lean sé leis ag labhairt Bascaise cé nach labhraíonn tromlach iriseoirí Almería, ná mórchuid na mBascach, an teanga”.
Dúirt an nuachtán laethúil is mó léamh i stát na Spáinne, an nuachtán sacair Marca, go raibh “íogaireacht agus gnáthchiall” in easnamh ag an bhainisteoir.
Mar sin féin, agus mar a bheifeá ag súil leis, tá tacaíocht láidir faighte ag Garitano i measc a phobail féin i dTír na mBascach.
Ar a bharr sin tá bainisteoir Barcelona, Luis Enrique, mar aon le hiarbhainisteoir an chlub Chatalónaigh agus ceannasaí reatha Bayern Munich, Pep Guardiola, tar éis a rá gur cheart go mbeadh cead ag Garitano a theanga féin a labhairt pé áit is mian leis.
Níl seasamh uasal an phreasoifigigh Moreno dearmadta ag Eibar ach an oiread agus é fógartha acu inné go bhfuil cárta seolta acu chuig uachtarán Almería ag gabháil buíochais le Moreno as cabhrú le Garitano ar an lá.
In ainneoin aitheantas oifigiúil bunreachtúil bheith ag an Bhascais, ag an Chatalóinis agus ag an Ghailísis, ní imeacht fánach é seo ó thaobh mheáin na Spáinne de agus is minic tráchtairí Spáinneacha ag gearán faoi úsáid na dteangacha seo, fiú ina gcroíthailte féin.
Mar aon gcéanna le háiteanna eile in iarthar na hEorpa, léiríonn an eachtra is déanaí seo go bhfuil bealach fada fós le dul go dtí go gcaitear go measúil agus go cothrom le teangacha mionlaithe na hIbéire.
