An 3,000,000ú Tweet seolta #TrasnanadTonnta

Seolfar an feachtas idirnáisiúnta Gaeilge #TrasnanadTonnta inniu i gceannáras Twitter i mBaile Átha Cliath, mar a bhfógrófar an trí mhilliúnú giolc Gaeilge. Seo í an tríú bliain don fheachtas, a tosaíodh i gCeanada, a bheith ar bun agus táthar ag súil le haird a tharraingt ar idirnáisiúntacht na Gaeilge sna laethanta amach romhainn.  

Dírithe ar “ghlantosaitheoirí agus chainteoirí líofa” araon atá #TrasnanadTonnta a fhéachfaidh le lucht labhartha na Gaeilge an teanga a úsáid ar líne, cibé cén áit ar domhan a bhfuil siad. Anuraidh, seoladh os cionn 10,660 giolc faoin haischlib i gcaitheamh na seachtaine agus bhí giolcairí i mbreis agus 80 tír ar fud an domhain ag glacadh páirt sa gcomhrá. 

Táthar ag súil go mbeidh cainteoirí Gaeilge in 100 tír páirteach sa bhfeachtas i mbliana, a bheidh ar siúl idir seo agus Dé hAoine. Tá os cionn leathchéad “ambasadóir” socraithe ag lucht eagraithe  an fheachtais — ICUF, Fulbright agus Conradh na Gaeilge — le cainteoirí Gaeilge ar fud  na cruinne a  spreagadh chun comhrá ar líne. 

Tá “ambasadóirí” eile fós ag teastáil i dtíortha eile le scéal #TrasnanadTonnta a scaipeadh,  agus is féidir le cainteoirí Gaeilge atá lonnaithe thar lear clárú leis an bhfeachtas anseo.

Ar dhuine de na hambasadóirí sin tá John Prendergast,  a chaith seal ina theagascóir le ICUF agus  atá anois ag obair le Fulbright i Meiriceá. Dúirt sé go bhfuil “gliondar ar [a] chroí” a bheith páirteach sa bhfeachtas i mbliana. 

“Is ionadaí den fheachtas Trasna na dTonnta mé ó 2017, an bhliain a tosnaíodh é. Agus mé i mo Ghael thar lear, le #TrasnaNadTonnta meabhraítear dom an bá agus an grá a bhíonn ag daoine dár dteanga uasal mórthimpeall na cruinne. Nasctar daoine le Gaeilge ón Afraic le foghlaimeoirí Gaeilge ón Rúis agus cruthaítear pobal beo ar líne, áit gur féidir ár bhféiniúlacht agus ár gcultúr a cheiliúradh. Bíonn gliondar ar mo chroí agam bheith páirteach gach bliain. Ní neart go cur le chéile!” a dúirt John. 

Dúirt Stiúrthóir Forbartha Chonradh na Gaeilge, Aodhán Ó Deá, go bhfuil “áthas an domhain” ar an  gConradh tacaíocht a thabhairt don fheachtas agus gur “céim shuntasach” í go bhfuil Twitter féin ag tacú leis an seoladh oifigiúil.

“Tá sé ríshoiléir dúinn san obair a dhéanann muid go bhfuil spéis ollmhór inár dteanga álainn thar sáile. Is fianaise dhoshéanta í #TrasnanadTonnta ar bheocht agus ar neart na Gaeilge ar leibhéal idirnaisiúnta,” a dúirt  Aodhán. 

Cuireadh tús luath luath leis an bhfeachtas sa Nua-Shéalainn inné, tír atá i bhfad chun cinn ar Éirinn ó thaobh ama de, nuair a sheol an giolcaire @TFaddey an teachtaireacht seo:

Tá eolas bailithe ag an ríomheolaí Kevin Scannell faoi úsáid na Gaeilge ar Twitter agus fógrófar  an tríú milliúnú giolc Gaeilge a seoladh, bunaithe ar an eolas sin, inniu. Ceithre bliana ó shin a seoladh an milliúnú giolc Gaeilge ar Twitter, beannacht Cásca ón gcomhlacht Oideas Gael i nGleann Cholm Cille. 

Ba é Trevor Herbert, múinteoir agus scoláire Gaeilge i mBaile Átha Cliath, a sheol an 2,000,000ú giolc mar fhreagra ar phictiúr de chomhartha Gaeltachta a chuir Sorcha Ní Riain, as oirthear Chorcaí, suas ar an suíomh ar an 22 Iúil 2017. 

Thiar sa mbliain 2006 a seoladh an chéad ghiolc Gaeilge riamh, ón gcuntas @Aine.