An fómhar seo, den chéad uair riamh, beidh mic léinn atá ag cur tús le céim altranais in Prifysgol Abertawe, Ollscoil Swansea, in ann riar maith den chúrsa a dhéanamh trí mheán na Breatnaise.
Seo an chéad bhliain atá an deis áirithe seo á tapú ag mic léinn atá ag gabháil do chúrsa altranais sa Bhreatain Bheag.
Is toradh é ar an fhás atá tagtha ar an scéim scoláireachtaí ollscoile, dar le Dafydd Trystan, ón eagraíocht Coleg Cymraeg Cenedlaethol, a reáchtálann an scéim.
Is é rialtas na Breataine Bige a bhunaigh Coleg Cymraeg Cenedlaethol thiar in 2011 le forbairt a dhéanamh ar sholáthar oideachais tríú leibhéal trí mheán na Breatnaise.
Mhínigh Dafydd do NÓS go bhfuil na scoláireachtaí dírithe ar dhaoine oilte dátheangacha a chothú in earnáil na sláinte go háirithe.
“Tá muid ag díriú go príomha ar ábhair a bhaineann le cúram sláinte, eolaíocht an spóirt agus eolaíocht sláinte, ábhair nach mbíodh ar fáil trí mheán na Breatnaise in ollscoileanna na tíre go traidisiúnta.
“Is é an aidhm atá ann daoine san earnáil cúram sláinte agus spóirt a spreagadh le go mbeidh dochtúirí, banaltraí agus eolaithe spóirt ar fáil a mbeidh scileanna dátheangacha úsáideacha acu,” ar sé.
Maidir lena leithéid de scéim in Éirinn, is é ceann de na fadhbanna a bheadh ann ná nach mbeadh go leor oideachasóirí le Gaeilge ar fáil ag an tríú leibhéal le go mbeadh dea-thoradh uirthi.
“Bhí an fhadhb sin againne,” a mhínigh Dafydd, “ach an rud a rinne an rialtas anseo ná maoiniú a chur ar fáil a bhí ina spreagadh ag daoine céimeanna dochtúireachta a dhéanamh trí mheán na Breatnaise sna hábhair a bhaineann le cúram sláinte.
“Mar thoradh air sin, tá léachtóirí i réimse ábhar againn anois a thug faoin dochtúireacht i mBreatnais,” ar sé.
Dúirt Dafydd go bhfuil siad ag obair chun “bun mar is ceart a chur faoin chóras le go mbeidh daoine oilte dátheangacha ag teacht fríd.”
Beidh 200 scoláire nua ag cur tús le céimeanna éagsúla san fhómhar agus scoláireachtaí á mbronnadh orthu.
Ina measc, tá duine den bheirt mhac léinn altranais, Rhian Evans, a mbeidh scoláireacht £1,500 á bronnadh uirthi le linn na céime.
Creideann Rhian go bhfuil tábhacht ollmhór le húsáid na Breatnaise, go háirithe i suíomh cúram sláinte.
“Is fearr le hothair an Bhreatnais a úsáid, go háirithe más í a gcéad teanga í.”
Dúirt Rhian gur baineadh siar aisti nuair a mhothaigh sí a laghad Breatnaise a bhí á labhairt in ionaid chúram sláinte, in ainneoin cónaí a bheith uirthi i gceantar tuaithe in iarthar na Breataine Bige.
Spreagadh mór a bhí sa scoláireacht tabhairt faoin dúshlán cuid dá céim a dhéanamh i mBreatnais, a dúirt sí.
