Cainteoirí Gaeilge in 102 tír páirteach i #TrasnanadTonnta

Ghlac giolcairí in 102 tír páirt sa bhfeachtas #TrasnandTonnta, a bhí ar siúl ar Twitter an tseachtain seo caite.

Ba é Fran Ó hAodha, Baile Átha Cliathach atá san Iaráic i láthair na huaire, a sheol giolc ón 100ú tír (an Iaráic) níos lú ná dhá uair an chloig roimh mheán oíche ar an lá deireanach den fheachtas.

Scríobhnóireacht Nebuchadnezzar a bhuil 4,000 bliain d’aois i Babylon, san Iráic inniú #TrasnanadTonnta2019 #TrasnanadTonnta pic.twitter.com/Sfj9rMkctL

— Fran O’hAodha (@Franohaodha) February 8, 2019

Tháinig giolcacha ón gCasacstáin agus ó Fhidsí ina dhiaidh sin, thug líon na dtíortha a ghlac páirt sa bhfeachtas suas go 102. Leag lucht eagraithe an fheachtais: ICUF, Fulbright agus Conradh na Gaeilge, an sprioc síos 100 tír a bhaint amach i rith na seachtaine. Ghlac breis agus 80 tír páirt sa bhfeachtas anuraidh.

Dúirt Aodhán Ó Deá, Oifigeach Forbartha Chonradh na Gaeilge, gur chuir sé áthas air gur spreagadh daoine nár labhair an Ghaeilge le fada páirt a ghlacadh sa gcomhrá mór a bhí ar bun an tseachtain seo caite.

“Bhíomar iontach sásta gur ghlac daoine in 102 tír páirt i #TrasnanadTonnta ar deireadh. Ón Airméin go dtí an tSiombáib, bhí idir fhoghlaimeoirí agus chainteoirí dúchais páirteach sa chomhrá ar líne i gcaitheamh na seachtaine.

“Ceann de na buaicphointí domsa go pearsanta ná na céadta comhrá a fheiceáil ó dhaoine nár labhair Gaeilge le blianta anuas. Tá súil agam go leanfaidh na daoine sin ag glacadh páirt i bpobal domhanda na Gaeilge agus iad tar éis nascadh le Gaeilgeoirí eile ar líne den chéad uair b’fhéidir. Tús maith, leath an spraoi!” a dúirt sé.

Cuireadh teachtaireachtaí ón tSiria, mar a bhfuil Éireannaigh ag troid sa gcogadh sa tír sin, chomh maith leis Aontas na nÉimíríochtaí Arabacha, mar a bhfuil go leor múinteoirí bunscoile ag cur fúthu, i measc áiteanna eile a mbíonn muintir ag tarraingt orthu go minic, an Astráil, an Nua-Shéalainn, Ceanada, agus beagnach gach stát sna Stáit Aontaithe.

Dírithe ar “ghlantosaitheoirí agus chainteoirí líofa” araon a bhí #TrasnanadTonnta, agus chonacthas le lucht labhartha na Gaeilge a spreagadh an teanga a úsáid ar líne, cibé áit ar domhan a raibh siad.

Anuraidh seoladh os cionn 10,600 giolc faoin haischlib. Beidh staitisticí agus eolas breise faoi fheachtas na bliana seo á bhfoilsiú ar NÓS sna laethanta amach romhainn.

Seo thíos na tíortha a ghlac páirt in 2019:

1 🇮🇪 Éire	2 🇺🇸 Na Stáit Aontaithe	3 🇨🇦Ceanada	4 🏴󠁧󠁢󠁥󠁮󠁧󠁿 Sasana	5 🏴󠁧󠁢󠁷󠁬󠁳󠁿 An Bhreatain Bheag
6 🏴󠁧󠁢󠁳󠁣󠁴󠁿Albain	7 🇪🇸 An Spáinn	8 🇷🇸 An tSeirb	9 🇲🇦 Maracó	10 🇯🇵 An tSeapáin
11 🇸🇪 An tSualainn	12 🇳🇿 An Nua-Shéalainn	13 🇭🇰 Hong Cong	14 🇦🇺 An Astráil	15 🇩🇰 An Danmhairg
16 🇧🇪 An Bheilg	17 🇫🇷 An Fhraince	17 🇫🇷 An Fhraince	18 🇧🇷 An Bhrasaíl	19 🇮🇹 An Iodáil
20 🇪🇬 An Éigipt	21 🇩🇪 An Ghearmáin	22 🇸🇾 An tSiria	23 🇵🇹 An Phortaingéil	24 🇵🇱 An Pholainn
25 🇲🇽Meicsiceo	26 🇭🇷 An Chróit	27 🇦🇪Aontas na nÉimíríóchtaí Arabacha	28 🇳🇴 An Iorua	29 🇮🇳 An India
30 🇱🇻 An Laitvia	31 🇳🇬 An Nigéir	32 🇦🇷 An Airgintín	33 🇱🇷 An Libéír	34 🇨🇭 An Eilvéis
35 🇿🇲 An tSaimbia	36 🇨🇾 An Chipir	37 🇧🇩 An Bhanglaidéis	38 🇵🇭 na hOileáin Fhilipíneacha	39 🇮🇲Oileán Mhanann
40 🇸🇬Singeapór	41 🇨🇴 An Cholóim	42 🇮🇩 An Indinéis	43 🇷🇺 An Rúis	44 🇿🇦 An Afraic Theas
45 🇳🇱 An Ísiltír	46 🇰🇪 An Chéinia	47 🇧🇴 An Bholaiv	48 🇦🇹 An Ostair	49 🇲🇾 An Mhalaeisia
50 🇮🇱Iosrael	51 🇸🇩 An tSúdáin	52 🇱🇺Lucsamburg	53 🇫🇮 An Fhionlainn	54 🇹🇿 An Tansáin
55 🇹🇼 An Téaváin	56 🇲🇹Málta	57 🇳🇵Neipeal	58 🇧🇬 An Bhulgáir	59 🇸🇦 An Araib Shádach
60 🇨🇺Cúba	61 🇹🇭 An Téalainn	62 🇸🇻 An tSalvadóir	63 🇪🇪 An Eastóin	64 🇴🇲Óman
65 🇻🇦 An Vatacáin	66 🇨🇳 an tSín	67 🇲🇱 Mailí	68 🇨🇷 Cósta Ríce	69 🇭🇺 An Ungáir
70 🇶🇦Catar	71 🇹🇷 An Tuirc	72 🇸🇰 An tSlóvaic	73 🇱🇹 An Liotuáin	74 🇯🇴 An Iordáin
75 🇬🇷 An Ghréig	76 🇵🇸 An Phalaistín	77 🇬🇪 An tSeoirsia	78 🇦🇲 An Airméin	79 🇮🇸 An Íoslainn
80 🇪🇨Eacuadór	81 🇺🇬Uganda	82 🇨🇲Camarún	83 🇲🇩 An Mholdóiv	84 🇨🇮 An Cósta Eabhair
85 🇷🇴 An Rómáin	86 🇻🇳Vítneam	87 🇰🇷 An Chóiré Theas	88 🇪🇹 An Aetóip	89 🇰🇼Cuáit
90 🇦🇱 An Albáin	91 🇲🇿Mósaimbíc	92 🇨🇿 An Seicia	93 🇱🇰 Srí Lanca	94 🇻🇪Veiniséala
95 🇵🇾Paragua	96 🇺🇾Urugua	97 🇿🇼 An tSiombáib	98 🇵🇪 Peiriú	99 🇺🇦 An Úcráin
100 🇮🇶An Iaráic	101 🇰🇿 An Chasacstáin	102 🇫🇯 Fidsí