Ní fada go mbeidh úsáideoirí na haipe foghlama teanga Duolingo in ann cúrsa i nGaeilge na hAlban a dhéanamh. Tá lucht na Gàidhlig ag feachtasaíocht le tamall de bhlianta anuas le haghaidh cúrsa Gàidhlig ar an aip, an aip foghlama teanga is mó ar domhan, agus i lár na hoíche aréir cuireadh an cúrsa nua i ‘ngoradán’ Duolingo.
Bíonn oibrithe deonacha ag obair ar chúrsa teanga i ‘ngoradán’ Duolingo agus táthar anois ag lorg cainteoirí Gàidhlig le cur leis an gcúrsa nua do chainteoirí Béarla. Táthar anois ag ‘Céim 1’ den phróiseas. Nuair a bheidh cuid mhaith den chúrsa curtha le chéile, cuirfear an leagan Beta den chúrsa ar fáil, agus nuair a thugtar aiseolas ar an gcúrsa sin, réiteofar an leagan críochnúil den chúrsa Gàidhlig.
Táthar ag súil go mbeidh an cúrsa Gàidhlig ar Duolingo ar fáil ar an 17 Iúil 2020, tuairim is bliain ón lá inniu. Is féidir le cainteoirí Gàidhlig cabhrú leis an bpróiseas anseo.
An bhliain seo caite chuir an iris scigiúil The Daily Gael tús le feachtas nua an teanga a chur ar fáil ar Duolingo. Bhí an Ghaeilge agus an Bhreatnais ar fáil ar Duolingo cheana féin, ach ainneoin iarrachtaí a rinneadh roimhe seo, níorbh fhéidir Gaeilge na hAlban a fhoghlaim ar an aip foghlama teanga.
Osclaíodh cuntas nua Twitter le haird a tharraingt ar an gceist agus le cainteoirí Gàidhlig a mhealladh a bheadh sásta an obair dheonach a theastaíonn leis an gcúrsa a chruthú a dhéanamh.
Is é Duolingo an aip teanga is mó ar domhan. Is acmhainn ar leith atá ann a thabharfaidh an chéad bhlaiseadh den teanga do dhaoine a bhfuil suim acu inti, agus dóibhsean atá ag iarraidh a scileanna teanga a thabhairt chun cinn. Cé gur dócha nach dtabharfaidh Duolingo féin líofacht teanga do dhuine, is dea-thosú a bheadh ann dóibhsean atá ag iarraidh an teanga a fhoghlaim.
“Tá a fhios againn go bhfuil suim mhór ag go leor daoine in Albain agus ar fud an domhain an Ghàidhlig a fhoghlaim, go háirithe de bharr cláracha ina gcluintear an Ghàidhlig, ar nós Outlander. Tá muid ag iarraidh é sin a dhéanamh níos éasca do dhaoine agus níos mó daoine a tharraingt isteach i saol na Gàidhlig,” a dúirt duine de lucht an fheachtais le NÓS anuraidh.
Bliain roimhe sin, d’fhógair an Feisire Parlaiminte Alasdair Allan go raibh rún aige scríobh chuig Duolingo féachaint an bhféadfaí an Ghàidhlig a chur ar fáil ar an aip. Is as Crìochan na h-Alba, i ndeisceart na tíre, é Allan ach tá sé ina fheisire i dTaigh an Ròid do na h-Eileanan an Iar, ceantar Gaeltachta in Albain. Thagair sé don rath mór atá ar an gcúrsa Gaeilge a chuireann Duolingo ar fáil, go háirithe i Meiriceá, agus é ag éileamh go mbeadh teanga Ghaelach a thíre féin ar fáil ann.
